Binəqədi rayonunda qadınlar üçün tibbi-sosial aksiya təşkil olunub VİDEO
Bakı, 4 may, AZƏRTAC
"Qadın Sağlamlığı Mərkəzi" İctimai Birliyi və Milli Onkologiya Mərkəzinin birgə təşəbbüsü ilə Binəqədi rayonunda tibbi-sosial aksiya keçirilib. Aksiyaya Bakı Patologiya Mərkəzi dəstək göstərib.
AZƏRTAC xəbər verir ki, aksiyada rayonun Mənzil-Kommunal İstismar sahələrində çalışan 200-dən çox qadın müayinə olunub. Skrininq müayinələrinin nəticələri Milli Onkologiya Mərkəzinə yönləndiriləcək.
Erkən diaqnoz və skrininqin xəstəliklərin müalicəsində mühüm rol oynadığını deyən "Qadın Sağlamlığı Mərkəzi" İctimai Birliyinin təsisçisi və sədri Fəridə Abbasova fikirlərinə belə davam edib: "Aksiyada qadın sağlamlığı çərçivəsində həm ginekoloji-kliniki müayinə, süd vəzi ultrasəs müayinəsi, həm də süd vəzi mütəxəssisinin kliniki müayinəsi aparılıb. Aksiyanın statistik nəticəsi mayın 25-də İctimai Birliyin keçirəcəyi I Ginekoloji Simpoziumda yayımlanacaq. Nəcib təşəbbüsə dəstək olan bütün tərəfdaşlarımıza dərin təşəkkürümü bildirirəm".
Milli Onkologiya Mərkəzinin baş həkimi, Səhiyyə Nazirliyinin baş onkoloqu Azad Kərimli Mərkəzin mütəmadi olaraq bölgələrdə profilaktik baxışlar həyata keçirdiyini, bugünkü müayinənin isə xüsusi xarakter daşıdığını diqqətə çatdıraraq deyib: “Aksiya çərçivəsində çalışan qadınlar müayinə olunublar. Məlumdur ki, dünyada, o cümlədən respublikamızda onkoloji xəstəliklər arasında süd vəzi xərçəngi öncül sıralardan birini tutur. Məqsədimiz bu onkoloji xəstəliyin vaxtında aşkarlanmasıdır. Əgər xəstəlik aşkarlanarsa, onun gələcək müayinə və müalicəsi Milli Onkologiya Mərkəzində aparılacaq. Ümidvaram ki, aksiyanın sonuna qədər hər hansı bir xəstəlik diaqnozu ilə qarşılaşmayacağıq”.
Bugünkü təşəbbüsü təqdirəlayiq hal adlandıran Yeni Azərbaycan Partiyası Binəqədi rayon təşkilatının sədri Vüsar İsmayılovun sözlərinə görə, qadınların bir hissəsinin tibb müəssisələrinə vaxtında müraciət edib müayinədən keçməməsi səbəbindən, sonradan aşkarlanan xəstəliklər onların həyatı və sağlamlığı üçün böyük problemlər yaradır. Bu nöqteyi-nəzərdən bugünkü aksiya qadınların sağlamlığı üçün çox mühüm əhəmiyyət kəsb edir. “Aksiyanın təşkili ictimaiyyət üçün də mühüm mesajdır. Vətəndaşlar, xüsusilə də qadınlar bilməlidirlər ki, öz işlərinə vaxt ayırarkən, sağlamlıqlarını da düşünməli, geri plana atmamalıdırlar. Ümid edirəm ki, gələcəkdə bu tədbirdən nəticə çıxaran xanımlar öz sağlamlıqlarının keşiyində dayanacaq və davamlı olaraq vaxtında tibb müəssisələrinə müraciət edəcəklər. Dua edirik ki, hansısa mənfi hal aşkarlanmasın. Əgər aşkarlanarsa, Milli Onkologiya Mərkəzinin peşəkar həkimləri onların sağalması üçün əllərindən gələni əsirgəməyəcəklər”, - deyə Vüsar İsmayılov əminliyini ifadə edib.
Aksiya iştirakçısı Xumar Quliyeva müayinələrin nəticəsində sağlamlığında heç bir problem aşkarlanmadığını deyib. O, təşkil edilən aksiyaya görə təşkilatçılara minnətdarlığını bildirib və bundan sonra sağlamlığına qarşı diqqətli olacağını, sistemli şəkildə müayinələrdən keçəcəyini vurğulayıb.
Digər iştirakçı Müşgünaz İsmayılova isə aksiyanın onlara sağlamlıqlarına qarşı laqeyd olmamağı aşıladığını deyib: “Çox gözəl təşəbbüsdür. Müayinələrdən keçdik. Şükür ki, heç bir xəstəlik aşkarlanmadı. Lakin yalnız şikayətlər olanda deyil, sağlamlıqla bağlı heç bir narahatlığımız olmayanda da belə, ildə iki dəfə müayinələrdən keçməyin vacibliyini öyrəndik”.
Belə aksiyaların ölkəmizin digər bölgələrində də davam etdirilməsi nəzərdə tutulur.
Bölmənin digər xəbərləri
