“Bir Könüllü” Təşkilatı MDU-da məlumatlandırma sessiyası keçirib
Bakı, 15 dekabr, AZƏRTAC
“Bir könüllü” Tələbələrin Əməkdaşlığı İctimai Birliyinin sədri Leyla Zeynalova Mingəçevir Dövlət Universitetinin (MDU) qonağı olub. Birliyin sədri, əvvəlcə, MDU-nun rektoru Şahin Bayramovla görüşüb.
Universitetdən AZƏRTAC-a bildirilib ki, qonağı salamlayan Ş.Bayramov hazırda müasirləşməkdə olan MDU-da tələbələrin hərtərəfli inkişafına xidmət edən və regionun inkişafına töhfə verən səmərəli ali təhsil mühitinin formalaşdırılmasının başlıca hədəflərdən olduğunu diqqətə çatdırıb. Qeyd edib ki, universitetdə tələbələrin asudə vaxtlarının səmərəli təşkili və çoxşaxəli könüllülük fəaliyyətinə cəlb olunması üçün müvafiq şəraitin yaradılmasına xüsusi önəm verilir. MDU-da könüllülərlə işin cari vəziyyəti barədə məlumat verən rektor bu sahədə əldə edilən uğurlu nəticələrdə “Bir” tələbə-könüllü proqramının əhəmiyyətli rolundan danışıb və əməkdaşlığın davamlı olmasını arzulayıb.
MDU-da könüllülük fəaliyyətinə göstərilən diqqətdən məmnunluğunu ifadə edən Birliyin sədri L.Zeynalova universitet tələbələrinin “Bir” tələbə-könüllü proqramında fəal təmsil olunduğunu vurğulayıb. Təmsil etdiyi təşkilatın başlıca fəaliyyət istiqamətlərindən və yeni layihələrindən danışan L.Zeynalova tələbələrin könüllülük fəaliyyətinə cəlb edilməsinin təşviqi ilə bağlı birgə fəaliyyətlərin potensial istiqamətləri barədə fikirlərini bölüşüb.
Sonra “Bir könüllü” Tələbələrin Əməkdaşlığı İctimai Birliyinin təşkilatçılığı ilə universitetdə tələbə və magistrantlar üçün məlumatlandırma sessiyası keçirilib.
Tədbirdə “Bir könüllü” Təşkilatının fəaliyyətini əks etdirən videoçarx nümayiş etdirilib və iştirakçıların sualları cavablandırılıb. Daha sonra müxtəlif yarışmalar təşkil olunub və fərqlənən tələbələr hədiyyələrlə mükafatlandırılıb.
Bölmənin digər xəbərləri
