“BİRBAŞA XƏTT” EKOLOJİ HÜQUQ POZUNTULARINI ÜZƏ ÇIXARMAĞA KÖMƏK ETMİŞDİR

23.07.2003 [22:56]
Çap et
A⁺ A^-

Ekologiya və Təbii Sərvətlər Nazirliyində bir ildən bəri fəaliyyət göstərən “birbaşa xətt” (39-18-63, 38-13-35) çoxlu ekoloji hüquq pozuntularını üzə çıxarmağa kömək etmişdir. Nazirliyin mətbuat xidmətindən AZƏRTAC-ın müxbirinə bildirmişlər ki, son 2 ay ərzində əhalidən, qeyri-hökumət təşkilatlarından daxil olmuş şikayət ərizələrinə baxılaraq, müvafiq tədbirlər görülmüşdür. Məsələn, Nərimanov rayonunun M.Nağıyev küçəsindəki 1927-ci məhəllədə yaşayış binası tikərkən 82 ağacı məhv etmiş inşaat şirkətinə qarşı 7.202.000 manat məbləğində iddia irəli sürülmüşdür. Ödənilmiş məbləğ təbiəti mühafizə fonduna köçürülmüşdür.

“Birbaşa xətt”ə zənglərin əksəriyyəti torpağın və atmosferin çirkləndirilməsi, qanunsuz qum daşınması faktları ilə bağlıdır. Kürdəxanı qəsəbəsində ekoloqların reydləri zamanı vətəndaş Faiq Rəhim oğlu Hüseynov bağ sahəsindən qanunsuz qum daşımağa cəhd göstərərkən tutulmuşdur. Bununla əlaqədar, akt və protokol tərtib edilmiş və həmin şəxs cərimələnmişdir. “Azərneftyanacaq” zavodu tərəfindən atmosferə zərərli tullantılar atılması barədə vətəndaş O.Quliyevin müraciətinə əsasən, ekoloji ekspertiza keçirilmişdir. Fakt təsdiq olunmuş və zavoddan ətraf mühitə dəymiş ziyana görə kompensasiya tələb edilmişdir.

“BİRBAŞA XƏTT” EKOLOJİ HÜQUQ POZUNTULARINI ÜZƏ ÇIXARMAĞA KÖMƏK ETMİŞDİR

MÜƏLLİFLƏ ƏLAQƏ

Bölmənin digər xəbərləri