SİYASƏT
Birləşmiş Ərəb Əmirliklərinin “The National” qəzetində Humanitar Forumla bağlı məqalə dərc edilib
Bakı, 8 oktyabr (AZƏRTAC). Oktyabrın 2-3-də Bakıda keçirilmiş IV Beynəlxalq Humanitar Forumda Azərbaycanın Dubaydakı baş konsulluğunun təşəbbüsü ilə “The National” qəzetinin iqtisadi məsələlər üzrə baş müxbiri Frank Kane də iştirak edib.
Konsulluqdan AZƏRTAC-a bildiriblər ki, “The National” qəzetində hazırda “Wall Street Journal”, “New York Times”, “Daily Telegraph” kimi nüfuzlu qəzetlərdən ezam olunmuş 200 müxbir çalışır. Həmin qəzetdə F.Kanenin Humanitar Forum haqqında silsilə məqalələri dərc edilib.
Forumun əhəmiyyəti haqqında yazan F.Kane bu tədbirin rəsmi açılış mərasimində Azərbaycan Prezidenti İlham Əliyevin nitq söylədiyini bildirir. Yazıda dövlətimizin başçısının multikulturalizmlə bağlı söylədiyi fikirlərə də yer verilir.