“Biz ictimai davranış qaydalarını təbliğ edirik” adlı layihə həyata keçiriləcəkdir
Bakı, 30 oktyabr (AZƏRTAC). Azərbaycan Respublikasının Prezidenti yanında Gənclər Fondunun (AzGF) maliyyə və Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə “Biz ictimai davranış qaydalarını təbliğ edirik” adlı layihə həyata keçiriləcəkdir.
ATGTİ-nin mətbuat xidmətindən AZƏRTAC-a bildirmişlər ki, layihənin həyata keçirilməsində məqsəd cəmiyyətdə riayət etməli olduğumuz düzgün davranış qaydalarını gənclər arasında təbliğ etməkdən ibarətdir.
Layihə çərçivəsində “İctimai davranış qaydaları” adlı kitabçanın və maarifləndirici posterlərin hazırlanması nəzərdə tutulmuşdur. Həmin kitabçaların ictimai yerlərdə, eləcə də ali və orta ixtisas təhsili müəssisələrində gənclərə paylanması planlaşdırılır. Kitabçada ictimai nəqliyyat, küçə, restoran və iş yerində, eləcə də piyadaların yol hərəkəti zamanı davranış qaydaları, salamlaşma, danışıq, müraciət, tanışlıq və təmizlik, siqaret çəkmək, sosial media və onlayn etiket qaydaları haqqında məlumat veriləcəkdir.
Bölmənin digər xəbərləri
