BMT Baş katibi: Bəşəriyyətin rifahı dənizlərdə təhlükəsizliyin təmin edilməsindən asılıdır
Bakı, 21 may, AZƏRTAC
BMT-nin Baş katibi Antonio Quterreş dünya güclərini beynəlxalq dəniz hüququna riayət etməyə və geosiyasi rəqabəti aradan qaldırmağa çağırıb, həmçinin artan təhdidlərin qlobal ticarəti, dəniz ekosistemlərini və davamlı sülhü təhlükə altına atdığı barədə xəbərdarlıq edib.
AZƏRTAC BMT-nin məlumatına istinadla xəbər verir ki, mayın 20-də keçirilən BMT Təhlükəsizlik Şurasının yüksəksəviyyəli müzakirəsində çıxış edən Antonio Quterreş qeyd edib: “Dəniz məkanları həm ənənəvi təhdidlər, həm də yeni təhlükələrlə – pirat hücumları, silahlı soyğunlar, insan alveri, terrorizm, kiberhücumlar və ərazi mübahisələri kimi artan təzyiqlərlə üzləşir, okeanlar və dənizlər ölkələrə aydın SOS siqnalı göndərir”.
Qədim zamanlardan dəniz yollarının xalqlar arasında möhkəm əlaqə vasitəsi olduğunu qeyd edən Baş katib əlavə edib: “Ancaq dəniz məkanları getdikcə daha çox gərginliklə üzləşir, bu sahədə təhlükəsizliyin təmin edilməsi qlobal sülh və təhlükəsizlik baxımından zəruridir”.
Baş katib 2025-ci ilin əvvəlində dənizlərdə pirat hücumlarının kəskin artmasına işarə edərək bildirib ki, Beynəlxalq Dəniz Təşkilatının (IMO) hesabatında bu halların ötən ilin eyni dövrü ilə müqayisədə 47,5 faiz artdığı göstərilir.
O, həmçinin Yəməndəki husi qüvvələrinin Qırmızı dəniz və Ədən körfəzində gəmiçiliyə davam edən hücumlarını, Qara dənizdəki naviqasiya fasilələrini və Qvineya körfəzi, Aralıq dənizi və Atlantik okeanı boyunca narkotik və insan alveri ilə məşğul olan cinayətkar şəbəkələrin artması faktını vurğulayıb. “Biz birlikdə bu cinayətlərə və dəniz təhlükəsizliyini təhdid edən və okean mühitimizi pisləşdirən digər fəaliyyətlərə qarşı mübarizə aparmalıyıq. Bəşəriyyətin rifahı naminə çox iş görməliyik. Birləşmiş Millətlər Təşkilatı sistemi gələcək nəsillər üçün dinc, təhlükəsiz və firavan dəniz məkanlarını təmin etmək məqsədilə üzv dövlətləri dəstəkləməyə hazırdır”, -deyə Antonio Quterreş bildirib.
İclasda Yunanıstan Gəmi Sahibləri Birliyinin prezidenti Melina Travlos BMT TŞ üzvlərinə ciddi xəbərdarlıq edib: qlobal gəmiçilik sistemi dayanarsa, dünya iqtisadiyyatı cəmi 90 gün ərzində çökəcək. O, beynəlxalq ticarətin 90 faizinin və hər il 12 milyard tondan çox yükdaşımaların dəniz nəqliyyatı vasitəsilə həyata keçirildiyi faktını qeyd edərək bildirib ki, gəmiçilik qlobal rifahın etibarlı keşikçisidir.
Bölmənin digər xəbərləri
