Bölgələrdə ayrı-ayrı yerlərdə leysan xarakterli yağış yağacaq - PROQNOZ VİDEO
Bakı, 14 avqust, AZƏRTAC
Yaxın iki gün ərzində - avqustun 15-i və 16-da Bakıda və Abşeron yarımadasında əsasən yağmursuz hava şəraiti müşahidə olunacaq. Arabir güclənən şimal-qərb küləyi əsəcək. Havanın maksimal temperaturunun 29-32 dərəcə isti olacağı gözlənilir.
Bu barədə AZƏRTAC-a Ekologiya və Təbii Sərvətlər Nazirliyinin Milli Hidrometeorologiya Xidmətinin Hidrometeoroloji Proqnozlar Bürosunun direktoru Gülşad Məmmədova məlumat verib.
O bildirib ki, bölgələrdə müşahidə olunan qeyri-sabit, yağıntılı hava şəraiti avqustun 17-dək davam edəcək: “Ayrı-ayrı yerlərdə yağıntılar leysan xarakterli, intensiv olacaq. Avqustun 16-sı gecə saatlarında əsasən dağlıq və dağətəyi rayonlarda yağıntıların bir qədər güclənəcəyi ehtimalı var. Gözlənilən yağıntılı hava şəraiti ilə əlaqədar çaylarda sululuğun artacağı, bəzi dağ çaylarından isə qısamüddətli sel keçəcəyi istisna olunmur. Havanın maksimal temperaturu aran rayonlarında 32-36, dağlıq ərazilərdə 20–25 dərəcə isti olacaq”, - deyə o qeyd edib.
Bölmənin digər xəbərləri
