Braziliyada “denge” qızdırmasına yoluxanların sayı 5 milyonu ötüb
Bakı, 22 may, AZƏRTAC
Braziliyada “denge” qızdırmasına yoluxanların sayı rekord həddə çataraq 5 milyonu ötüb, bu xəstəlikdən 3 minə yaxın ölüm halı təsdiqlənib.
AZƏRTAC xəbər verir ki, Braziliya Səhiyyə Nazirliyinin məlumatına görə, hazırda ölkə öz tarixinin ən böyük “denge” epidemiyasını yaşayır və xəstəlik bəzi qonşu ölkələrə də yayılır.
Nazirlik il ərzində yoluxma hallarının sürətli artımını iqlim dəyişikliyi kimi amillərlə əlaqələndirir.
Ümumdünya Səhiyyə Təşkilatının (ÜST) məlumatına görə, 2009-cu ildən bəri bu xəstəliyə yoluxma halları kəskin şəkildə artıb. Dünya əhalisinin yarısının “denge” qızdırmasına yoluxma riskinin olduğunu bildirən ÜST bunun çox ciddi problemə çevrilə biləcəyi barədə xəbərdarlıq edib.
Bölmənin digər xəbərləri
