Bakı, 6 aprel, AZƏRTAC

Belçikanın paytaxtı Brüsseldə ABŞ Dövlət katibi Antoni Blinken, Avropa Komissiyasının Prezidenti Ursula Fon der Lyayen və Ermənistanın baş naziri Nikol Paşinyan arasında keçirilən üçtərəfli görüşün detallarının açıqlanmaması rəsmi Bakının narahatlığının əsaslı olduğunu göstərdi. Üçtərəfli konfransa iki gün qalmış Antoni Blinken, bir gün qalmış isə Ursula Fon der Lyayenin Azərbaycan Prezidenti İlham Əliyevə zəng etməsi, sadəcə, təskinlik xarakteri daşıyırdı. Əslində, Qərb dövlətləri də çox gözəl başa düşürdülər ki, rəsmi Bakının haqlı olaraq Brüssel görüşündən narahatlığının əsası var. Çünki indiki məqamda İrəvana siyasi, hərbi dəstəyin verilməsi əsasən Azərbaycana qarşı atılmış addımdır. Çünki Ermənistan Azərbaycanı özünə bir nömrəli düşmən sayır və oradakı revanşist qüvvələr qisas hissi ilə alışıb-yanırlar.

Bu sözləri AZƏRTAC-a açıqlamasında politoloq Ramiz Alıyev söyləyib.

O bildirib ki, ABŞ və Avropa Komissiyası rəsmiləri dövlətimizin başçısı ilə telefon danışıqlarında bu görüşün ölkəmizə qarşı olmadığı, Ermənistanla iqtisadi əlaqələrin inkişafına həsr olunduğu barədə məlumat veriblər. Aydın məsələdir ki, Qərb Azərbaycan və Türkiyə kimi dövlətlərlə sərhədləri bağlı olan Ermənistanı iqtisadi böhrandan xilas edə bilməz. Azərbaycana və Türkiyəyə qarşı düşmən münasibətdə olan, Rusiyadan uzaqlaşma xətti tutan Ermənistan regiona necə inteqrasiya oluna bilər? ABŞ-ın Ermənistandakı iqtisadi islahatları dəstəkləmək üçün ayıracağı 65 milyon dolların İrəvanı dirçəldəcəyini düşünmək sadəlövhlük olardı. Üstəlik nəzərə almaq lazımdır ki, Ermənistan iqtisadiyyatı bu gün İran və Rusiyadan çox asılıdır. Yəni, Ermənistanın sağ qalması, böhrandan çıxması Qərbdən deyil, Azərbaycan, Türkiyə, Rusiya və İrandan asılıdır. Deməli, Qərb rəsmilərinin “Brüssel görüşü Ermənistana ticari-iqtisadi yardım xarakter daşıyır” tezisləri məntiqdən uzaqdır, inandırıcı görünmür. Reallıq ondan ibarətdir ki, xarici güclər Cənubi Qafqazda yeni münaqişə ocağını körükləmək istəyirlər. Şübhəsiz ki, görüşün əsas xətti Ermənistanın Rusiya və İrandan uzaqlaşması, bunun qarşılığında İrəvanın anti-Azərbaycan, anti-Türkiyə siyasətini dəstəkləməkdən ibarət idi. Biz bunu həm A.Blinkenin, həm də Avropa Komissiyasının rəsmisinin mətbuata açıqlamalarından da gördük. Nikol Paşinyanın “sülh kəsişməsi” layihəsini dəstəkləyən Qərb dövlətləri nədənsə, Ermənistanın Azərbaycanın sülh təkliflərinə niyə cavab verməməsinə, nə üçün işğal altındakı kəndlərimizi hələ də qaytarmamasına, sülh müqaviləsi bağlamamasına toxunmadılar. Azərbaycanın Qərb rayonlarını Naxçıvanla birləşdirəcək Zəngəzur dəhlizinin açılması ilə bağlı da Paşinyana heç bir təsir göstərilmədi.

Politoloq qeyd edib ki, Qərbin Cənubi Qafqazla bağlı təhlükəli siyasəti təkcə Azərbaycanı deyil, Rusiya, İran və Türkiyəni də ciddi narahat edir: "Dünən Türkiyənin sabiq xarici işlər naziri, millət vəkili və NATO Parlament Assambleyasındakı nümayəndə heyətinin rəhbəri Mövlud Çavuşoğlunu qəbul edən Prezident İlham Əliyev ABŞ, Avropa İttifaqı və Ermənistan arasında Brüsseldə keçirilən üçtərəfli görüşə toxunaraq qeyd etdi ki, bu formatda görüş Cənubi Qafqazda növbəti təhlükə mənbəyi yaratmağa xidmət edir. Dövlətimizin başçısının da qeyd etdiyi kimi, ABŞ və Aİ rəsmiləri görüşün Azərbaycanın əleyhinə olmadığına bizi inandırmağa çalışsalar da, aparılan xəlvəti danışıqlar, yürüdülən pərdəarxası siyasət bunun əksini göstərir. Keçən ilin sentyabrından bu günə qədər Qərbin Azərbaycan əleyhinə verdiyi bəyanatlar, Ermənistanın silahlandırılması gələcəkdə çox böyük fəsadlar törədəcək. Mövlud Çavuşoğlu da öz növbəsində bir daha Türkiyənin mövqeyini təkrarlayaraq bildirib ki, Fransa başda olmaqla, digər Avropa dövlətləri sülhün əldə olunması üçün Ermənistana təzyiq göstərməlidirlər. Amma Türkiyəyə yaxşı məlumdur ki, Qərb, xüsusilə də rəsmi Paris bütün imkanları ilə regionda sülhü əngəlləməyə çalışır. Təbii ki, dünyada geosiyasi vəziyyətin gərginləşdiyi bir dönəmdə Azərbaycan–Türkiyə birliyi indi daha vacibdir”.

R.Alıyev hesab edir ki, sönük və Ermənistanda heç bir ajiotaj doğurmayan Brüssel görüşü Ermənistanı ağ günə çıxarmayacaq: “İrəvan Gürcüstan və Ukraynaya verilən vədlərin qarşılığında bu ölkələrin Rusiyadan aldıqları zərbələrdən ibrət dərsi götürməli idi. Qərb 2008-ci ildə Gürcüstanı, 2022-ci ildə Ukraynanı Rusiyadan necə “qoru”dusa, Ermənistanı da o cür “qoru”yacaq. Düşünürəm ki, Qərb regionda balanslı siyasət yürütmək, Azərbaycanla uzunmüddətli əməkdaşlıq etmək istəyirsə, Ermənistanı silahlandırmaq yox, sülh danışıqlarının sürətləndirilməsinə dəstək olmalıdır. Azərbaycanın razılığı və iştirakı olmadan Cənubi Qafqazın siyasi, iqtisadi xəritəsində hansısa dəyişikliklər etmək mümkün deyil”.