Bu gündən kosovalılar Şengen bölgəsinə vizasız səyahət etməyə başlayıblar
Bakı, 1 yanvar, AZƏRTAC
Kosovo vətəndaşları Şengen bölgəsinə vizasız səyahət etmək hüququ qazandıqdan sonra ilk səfərlərə başlayıblar.
AZƏRTAC xarici KİV-ə istinadla xəbər verir ki, Kosovo hökuməti Baş nazir Albin Kurt və xarici işlər və diaspor naziri Donika Gervalla-Şvars hava limanında Vyanaya vizasız gedəcək sərnişinləri yola salıblar.
Baş nazir Kurti çıxışında 2024-cü ildən vizasız səyahət imkanının qüvvəyə minməsi ilə Kosovoya edilən ədalətsizliyin aradan qaldırıldığını bildirib: “Uzun müddət gözlədik, bir çox imkanlardan məhrum olduq, ona görə də bu gün əhəmiyyətli bir gündür”.
Xarici işlər və diaspor naziri Donika Gervalla-Şvars isə bildirib ki, artıq gərəksiz bürokratiya yoxdur. Onun sözlərinə görə, Kosovo biznesmenləri də öz fəaliyyət sahələrini genişləndirmək və ölkəyə daha yaxşı və daha davamlı investisiyalar gətirmək imkanı əldə edəcəklər”.
Bu gündən etibarən kosovalılar Şengen bölgəsinə 180 günlük müddət ərzində 90 günə qədər vizasız gedə bilərlər. Beləliklə, Qərbi Balkanlarda sözügedən bölgəyə vizasız gedə bilməyən ölkə qalmayıb.
Bölmənin digər xəbərləri
