BÜLƏND ARINÇ TÜRKİYƏ BÖYÜK MİLLƏT MƏCLİSİNİN SƏDRİ SEÇİLMİŞDİR
Noyabrın 19-da Türkiyə Böyük Millət Məclisində keçirilmiş parlament sədri seçkisində Ədalət və İnkişaf Partiyasının namizədi Bülənd Arınç 369, Cümhuriyyət Xalq Partiyasının namizədi Öndər Sav 173 səs toplamışdır. Konstitusiyaya görə, parlament sədrinin seçilməsi üçün ilk turda namizəd səslərin üçdə ikisini qazanmalıdır. Beləliklə, tələb olunan sayda səs toplamış Bülənd Arınç Türkiyə Böyük Millət Məclisinin sədri seçilmişdir.
Bülənd Arınç 1948-ci ildə Bursa şəhərində anadan olmuşdur. Ankara Universitetinin hüquq fakultəsinin məzunudur. 1995-ci ildə Rifah Partiyasından, 1999-cu ildə Fəzilət Partiyasından, 2002-ci ilin noyabrında keçirilmiş növbədənkənar seçkilərdə isə Ədalət və İnkişaf Partiyasından millət vəkili seçilmişdir. Evlidir, iki övladı var.
Tural Rzayev
AZƏRTAC-ın xüsusi müxbiri
Ankara
Bölmənin digər xəbərləri
