CAR-ın G20-yə sədrliyi həmrəylik və bərabərlik prinsipini rəhbər tutacaq
Bakı, 22 yanvar, AZƏRTAC
Cənubi Afrika Respublikasının (CAR) G20-yə sədrliyi həmrəylik, bərabərlik və davamlı inkişafı vurğulayacaq.
AZƏRTAC xarici mediaya istinadla xəbər verir ki, bu barədə CAR Prezidenti Siril Ramafosa İsveçrənin Davos şəhərində Dünya İqtisadi Forumundakı çıxışında bildirib.
CAR Prezidenti deyib: “Biz G20 çərçivəsində hamı üçün tərəqqiyə nail olmaq yolunda, heç bir insanın və ölkənin geridə qalmamasını təmin etmək naminə kollektiv səylər vasitəsilə həmrəyliyi necə gücləndirə biləcəyimizə daha çox diqqət yetirməyə çalışacağıq”.
S. Ramafosa vurğulayıb ki, artan geosiyasi gərginlik, təkqütblülük, millətçilik, proteksionizm, təcridolunma, həmçinin borcların artması və ümumi məqsəd hissinin azalması ilə əlamətdar olan bir dövrdə planetimizin məhvini dayandırmaq üçün təcili birgə tədbirlər həyata keçirilməlidir.
Cənubi Afrikanın G20-yə sədrliyinin prioritetləri arasında ədalətli enerji keçidi üçün maliyyənin səfərbər edilməsi və BMT-nin iqlim dəyişikliyi sammitlərində razılaşdırıldığı kimi, inkişaf etməkdə olan ölkələr üçün iqlim maliyyə axınının keyfiyyət və kəmiyyətini artırmaq məqsədilə razılaşmaların təmin edilməsi məsələləri də yer alır.
Prezident Ramafosa əlavə edib: “Bizim hasilat mənbəyinə yaxın kritik minerallara əlavə dəyər qazandıran böyük sövdələşməyə doğru irəliləyişi təmin etmək üçün yaşıl sənayeləşmə və investisiyalara ehtiyacımız var”.
CAR Afrikada, eləcə də Qlobal Cənubda yaşıl sənayeləşmə yolu ilə böyümə və inkişafda kritik mineralların rolunu müdafiə etmək üçün G20 sədrliyindən istifadə etməyi hədəfləyir. “Bu, CAR, Afrika qitəsi və dünya üçün böyük əhəmiyyət kəsb edən bir məqamdır, çünki məhz bizim qitədə ölkələrin əməkdaşlığı üçün geniş potensial mövcuddur”, -deyə Ramafosa vurğulayıb.
Bölmənin digər xəbərləri
