Cəlil Xəlilov: 20 Yanvar hadisələri qürur və iftixar mənbəyi kimi xatırlanacaq
Bakı, 19 yanvar, AZƏRTAC
Sovet rəhbərliyi Azərbaycan xalqına qarşı törədilən dəhşətli cinayəti gizli saxlamağa, xalqımızın milli azadlıq hərəkatını qan gölündə boğmağa cəhd göstərirdi. Ona görə də 20 Yanvar faciəsi haqqında hər hansı informasiyanın ictimailəşməsinə imkan vermir, baş verənləri ört-basdır etməyə çalışırdı. Ulu Öndər Heydər Əliyev məhz belə bir zamanda özünün və bütün ailə üzvlərinin təhlükəsizliyini riskə ataraq, 20 Yanvar faciəsi ilə bağlı həqiqətləri cəsarətlə dilə gətirdi. Baş verən hadisədən cəmi bir gün sonra –1990-cı il yanvarın 21-də faciə ilə əlaqədar Azərbaycanın Moskvadakı daimi nümayəndəliyində keçirilən yığıncaqda çıxış edərək, sovet ordusunun Bakıdakı cinayətinin hüquqa, humanizmə, insanlığa zidd olduğunu bildirdi. 1990-cı il yanvarın 19-dan 20-nə keçən gecə sovet imperiyası tərəfindən xalqımıza qarşı törədilən dəhşətli cinayətə ilk obyektiv siyasi qiymət xalqımızın Ümummilli Lideri Heydər Əliyev tərəfindən verildi.
Bunu AZƏRTAC-a verdiyi açıqlamada Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov bildirib.
O, Ulu Öndər Heydər Əliyevin həmin faciəni yüksək tribunalardan dilə gətirərək, sovet imperiyasının Azərbaycan xalqına qarşı cinayətini ifşa etdiyini bildirib: “1991-ci il martın 7-də Azərbaycan Respublikası Ali Sovetinin sessiyasında çıxış edən Ümummilli Lider Heydər Əliyev 20 Yanvar hadisəsinin sifarişçilərinin və icraçılarının müəyyən olunaraq məsuliyyətə cəlb edilməsi məsələsini qaldırdı. 1994-cü il martın 29-da Ulu Öndərin səyi ilə Milli Məclis 20 Yanvar faciəsinə dövlət səviyyəsində tam siyasi-hüquqi qiymət verdi. Parlamentin qərarında açıq şəkildə qeyd edildi ki, 20 Yanvar hadisələri Azərbaycan xalqının milli azadlıq hərəkatını boğmaq, öz taleyini həll etmək üçün ayağa qalxan xalqa sovet hərb maşınının gücünü nümayiş etdirmək üçün törədilib”.
Cəlil Xəlilov vurğulayıb ki, 20 Yanvar faciəsindən 36 il ötsə də, xalqımız bu gün də əliyalın halda sovet tanklarının qarşısına çıxan qəhrəmanlarının xatirəsini ehtiramla anır, onlarla qürur duyur. “Xalqın öz qəhrəmanlarına olan münasibəti onu deməyə əsas verir ki, illər, əsrlər sonra da 20 Yanvar şəhidləri xalqımız tərəfindən həmişə xatırlanacaq, onların qəhrəmanlığı gənclər üçün qürur və iftixar mənbəyi olaraq qalacaq”, - deyə polkovnik diqqətə çatdırıb.
Bölmənin digər xəbərləri
