Cəlilabadda Bakı sakininin avtomobilindən 4 kiloqramdan artıq narkotik maddə aşkarlanıb
Cəlilabad, 12 avqust, Bağır Əliyev, AZƏRTAC
Cəlilabad Rayon Polis Şöbəsinin əməkdaşlarının keçirdikləri növbəti əməliyyat tədbirləri ilə 4 kiloqramdan artıq narkotik vasitə və psixotrop maddə aşkarlanaraq qanunsuz dövriyyədən çıxarılıb.
Daxili İşlər Nazirliyinin Mətbuat Xidmətinin Lənkəran regional qrupundan AZƏRTAC-ın bölgə müxbirinə verilən məlumata görə, Cəlilabad Rayon Polis Şöbəsinin əməkdaşlarının daxil olmuş məlumat əsasında keçirdikləri əməliyyat tədbirləri ilə narkotik vasitələrin qanunsuz dövriyyəsində şübhəli bilinən Bakı şəhər sakini, əvvəllər məhkum olunmuş Hüseyn Quluzadə idarə etdiyi “Ford” markalı avtomobillə Cəlilabad rayonu ərazisində saxlanılıb.
H.Quluzadənin üzərinə keçirilən baxış zamanı onun idarə etdiyi avtomobildən ayrı-ayrı bağlamalarda 2 kiloqram 530 qram heroin, 1 kiloqram 205 qram tiryək, 775 qram metamfetamin, 1 ədəd beşbarmaq və 1 ədəd bıçaq aşkar edilərək götürülüb.
Davam etdirilən tədbirlərlə H.Quluzadənin həmin narkotik vasitə və psixotrop maddəni tanışı, Bakı şəhər sakini Təbriz Babayevə çatdırmalı olduğunu müəyyən edilib.
Polis əməkdaşlarının keçirdikləri tədbirlərlə T.Babayev də saxlanılıb və onun üzərindən metamfetamin və marixuana aşkarlanaraq götürülüb.
Bölmənin digər xəbərləri
