CƏLİLABAD. Konfrans əsaslı təmir edilmiş Ziyalılar evinin açılışı ilə eyni vaxta düşdü. Rayonun ən geniş, səliqəli, gözəl, rahat sarayında işə başlayan konfransda çıxış edən natiqlər ötən dərs ilinin nailiyyətlərindən fərəhlə danışdılar, nöqsanları diqqətə çatdırdılar. Təlim-tərbiyə işlərinin səviyyəsinin yüksəldilməsi, təhsil islahatının bütün dolğunluğu ilə həyata keçirilməsi yollarından geniş söhbət açıldı. Prezident Heydər Əliyevin müvafiq Sərəncamına əsasən məktəb tikintisinin miqyasını genişləndirmək, tədris ocaqlarının maddi-texniki bazasını daha da möhkəmlətmək sahəsində qarşıda duran vəzifələr müzakirə olundu. Qeyd edildi ki, cari dərs ilinə mütəşəkkil hazırlıq görülmüşdür. Göytəpədəki 1 nömrəli Allar, Bəcirəvan, Həziabad, Seyidbazar, Dövlətəlibəyli, Kürdlər və daha bir neçə kənddəki məktəblər dövlət vəsaiti hesabına əsaslı təmir edilmişdir. Ümumiyyətlə, rayonun bütün məktəbləri daxili imkanlar, xeyriyyəçilərin hesabına cari və əsaslı təmir olunmuşdur. Yaxın vaxtlarda Allar kəndində, rayon mərkəzində yeni məktəb binalarının tikintisinə başlanacaqdır. Çıxış edənlər 15 oktyabr Prezident seçkilərində fəal iştirak edəcəklərini bildirdilər. Test imtahanında 669 və 620 bal toplayaraq BDU-nun tələbələri sırasına qoşulmuş Cəlal Bağırov və Gündüz Əliyev qiymətli hədiyyə ilə mükafatlandırıldılar.

X X X

BİLƏSUVAR. Son vaxtlar rayonda təhsilin inkişafına diqqət xeyli artmışdır. Bu fikir müəllimlərin avqust konfransında xüsusi vurğulandı. Qeyd edildi ki, bu il ali məktəblərə ötən ildəkindən xeyli çox –130-dan artıq biləsuvarlı abituriyent qəbul edilmişdir. Yerlərdə yol verilmiş ayrı-ayrı nöqsanlar ciddi tənqid olundu, qarşıda duran vəzifələrin həyata keçirilməsi yolları müəyyənləşdirildi. Bildirildi ki, 30-dan artıq məktəb əsaslı və cari təmir edilmişdir. Şəhərdəki 6 nömrəli məktəb, həmçinin Səmədabad kənd orta məktəbi üçün yeni binaların tikiləcəyi xəbəri razılıqla qarşılanmışdır.

X X X

YARDIMLI. Konfransda çıxış edənlər rayonda təhsil islahatının uğurla həyata keçirildiyini vurğuladılar. Diqqətə çatdırıldı ki, hər il daha çox məzununun tələbə adı qazanması ilə fərqlənən Yardımlı müəllimlərinin pedoqoji məharətindən, elmi hazırlıqlarından hələ lazımınca istifadə olunmur. Arzulandı ki, yeni məktəblər tikilməsinə, təhsil müəssisələrinin maddi-texniki bazasının müasir tələblər səviyyəsinə qaldırılmasına diqqət daha da artırılsın.

X X X

LERİK. Ötən dərs ilində görülmüş işləri obyektiv təhlil edən, qarşıdakı vəzifələri aydınlaşdıran konfransda razılıqla qeyd olundu ki, rayonda təhsil sahəsində fərəhləndirici nailiyyətlər qazanılıb. Bunun bariz təsdiqi olaraq, ali məktəblərə yüksək balla qəbul edilmiş on nəfərdən çox istedadlı gənc qiymətli hədiyyə ilə, onların fənn müəllimləri pulla mükafatlandırıldılar. Rayonda, xüsusilə təhsil ocaqlarında həyata keçirilən abadlıq-təmir işlərindən geniş söhbət açıldı. Bilavər və Rvarud kənd orta məktəblərində tikinti üçün Təhsil Nazirliyi tərəfindən 243 milyon manat vəsaitin ayrılması razılıqla qarşılandı. Bildirildi ki, Lerik qəsəbəsindəki əsas məktəb Yaponiyanın ölkəmizdəki səfirliyinin maliyyə vəsaiti hesabına oktyabrın 15-dək yeni binaya sahib olacaqdır. Təhsilin ayrı-ayrı sahələri barədə təklif və mülahizələr söyləndi.

X X X

Rayonların icra hakimiyyəti başçılarının, Təhsil Nazirliyinin məsul işçilərinin iştirak etdikləri konfranslarda müəllimlərin XII qurultayına nümayəndələr seçilmişdir.