CƏNUBİ ASİYADA DAŞQINLAR
AZƏRTAC xarici informasiya agentliklərinə istinadla xəbər verir ki, güclü mövsümi musson yağışları nəticəsində əmələ gələn daşqınlar son beş həftə ərzində Cənubi Asiya ölkələrində yüzlərlə adamın həyatına son qoymuşdur. Hindistanın şimal-şərqində 250-dən çox adam tələf olmuş, 3 milyon insan evsiz-eşiksiz qalmışdır. Brahmaputra çayı məcrasından çıxaraq, 800 kvadrat kilometr ərazisini basmışdır. Regionun digər ölkələrində də tələfat var. Məsələn, Banqladeşdə 129, Nepalda isə 54 nəfər təbii fəlakətin qurbanı olmuşdur. Banqladeş çayının deltasında bir çox bölgə su altında qalmışdır. Təbii fəlakət Çindən də yan ötməmişdir. Builki daşqınlar ölkəyə 4 milyard dollardan çox ziyan vurmuşdur. Burada 569 nəfər həlak olmuş, 140 milyon adamın həyatı pozulmuşdur . Daşqınlar nəticəsində 500 mindən çox ev dağılmış, 1,33 milyon ev və tikili isə zədələnmişdir. 10 milyon hektara yaxın əkin sahəsini su basmışdır. ÇXR Maliyyə Nazirliyi 11 əyalətə və muxtar rayona təbii fəlakətlə mübarizə üçün 110,9 milyon yuan məbləğində yardım ayırmışdır. Əhali içməli su, ərzaq və dava-dərmanla təmin edilir. Əfqanıstanda da daşqınlar baş vermişdir. BMT-nin nümayəndəsi iyulun 15-də Kabildə bildirmişdir ki, Bamian əyalətində və ölkənin mərkəzi hissəsində azı 9 nəfər həlak olmuş, 24 nəfər itkin düşmüşdür. Ötən həftə Hindiquş dağ silsiləsinin ətəklərini də su basmışdır. BMT mütəxəssisləri daşqının vurduğu ziyanın məbləğini müəyyənləşdirmək üçün təbii fəlakət zonasına gəlmiş, çadırlar və adyallar gətirmişlər.
