Cənubi Koreya qəzeti Bakıdakı Zəfər paradından yazır
Pekin, 17 dekabr, AZƏRTAC
Cənubi Koreyanın “Naewoeilbo” gündəlik qəzetində "Azərbaycan Qarabağ qələbəsini hərbi paradla qeyd edir" başlıqlı məqalə dərc olunub.
AZƏRTAC xəbər verir ki, qəzetin Koreya və ingilis dillərindəki versiyalarında olan məqalədə dekabrın 10-da Bakıda Azadlıq meydanında keçirilmiş paradın Azərbaycanın beynəlxalq səviyyədə tanınan ərazisi olan Qarabağda 44 gün davam etmiş müharibədə Ermənistan üzərində qazanılan qələbəyə həsr olunduğu bildirilib.
Qeyd olunub ki, Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın, iki ölkənin yüksək vəzifəli rəsmilərinin iştirak etdikləri paradda 2-ci Qarabağ savaşında qələbəni təmin edən qoşun növlərinin və hərbi texnikanın təntənəli keçidi olub.
Nəşr Prezident İlham Əliyevin paraddakı çıxışında söylədiyi "Azərbaycan 44 gün ərzində parlaq qələbə qazanaraq Ermənistanı məğlub etdi, işğala son qoydu. Bu 44 günün hər günü bizim şanlı tariximizdir" fikrinə yer verib. Bundan başqa, Prezident Rəcəb Tayyib Ərdoğanın Türkiyə və Azərbaycanın kürək-kürəyə verdikcə çətinliklərin öhdəsindən gəlməyə, uğurdan-uğura çatmağa davam edəcəkləri barədə fikirləri də məqalədə əksini tapıb.
Bildirilib ki, parad zamanı Xəzər dənizi sahilindəki iri Azadlıq meydanında 3000 nəfərdən artıq şəxsi heyətin, 150-dək hərbi texnikanın, o cümlədən müasir hərbi texnikanın, raket və artilleriya qurğularının, hava hücumundan müdafiə sistemlərinin, eləcə də dənizdə hərbi gəmi və katerlərin nümayişi olub. Paradda, həmçinin 6 həftəlik müharibə zamanı Azərbaycan Ordusunun darmadağın etdiyi, düşməndən ələ keçirdiyi hərbi qənimətlərin bir qismi də nümayiş etdirilib.
Qeyd olunub ki, 2-ci Qarabağ müharibəsində Azərbaycan Ordusu düşməndən xeyli sayda texnika, silah-sursat ələ keçirib, Azərbaycan Silahlı Qüvvələri "Dəmir yumruq" adlı əməliyyatın gedişində 300-dən çox yaşayış məntəqəsini düşməndən azad edib. Noyabrın 8-də Şuşanın, ertəsi gün isə 70-dən çox kəndin azad edilməsindən sonra Azərbaycan, Rusiya və Ermənistan liderləri tam atəşkəs barədə bəyanat imzalayıblar. Həmin sənədə əsasən, Ermənistanın işğalı altında olan Ağdam, Kəlbəcər və Laçın rayonları döyüşsüz Azərbaycan qaytarılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
