CƏNUBİ QAFQAZDA MALYARİYA İLƏ BAĞLI ƏN YAXŞI VƏZİYYƏT AZƏRBAYCANDADIR
Dünya Səhiyyə Təşkilatının (DST) Azərbaycanda səfərdə olan regional müşaviri Mixail Lvov AZƏRTAC-ın müxbirinə bildirmişdir ki, Cənubi Qafqazın digər ölkələri ilə müqayisədə respublikamızda malyariya ilə bağlı epidemioloji vəziyyət daha yaxşıdır.
O, səfərinin məqsədindən danışaraq demişdir ki, DST Cənubi Qafqaz ölkələrində malyariya ilə bağlı vəziyyətə dair regional monitorinq keçirir. Mixail Lvov səfər zamanı dövlət strukturlarının və beynəlxalq təşkilatların rəhbərləri ilə bu yöndə proqramların maliyyələşdirilməsinə dair danışıqlar aparmışdır. Hazırda DST-nin başlıca vəzifəsi Azərbaycanın müxtəlif dövlət strukturlarının, o cümlədən Səhiyyə və Kənd Təsərrüfatı nazirliklərinin diqqətini qazanılmış uğurların qorunub saxlanmasına cəlb etməkdir. Azərbaycanda malyariyaya yoluxma ən çox 1996-cı ildə olmuşdur. O zaman kənd rayonlarının bir çoxu daşqına məruz qalmışdı. Ona görə də bu il baş verən oxşar təbii fəlakət malyariya epidemiyasının yayılmaması üçün həm DST , həm də ölkə hökuməti tərəfindən təxirəsalınmaz tədbirlər görülməsini tələb edir.
Bölmənin digər xəbərləri
