Cənubi Qafqazda mövcud münaqişələr regionda sülh və təhlükəsizliyə başlıca təhdiddir
Bakı, 16 iyul (AZƏRTAC). Niderlandın Klingendal Beynəlxalq Əlaqələr İnstitutunun təşkil etdiyi Cənubi Qafqaz regionundan olan diplomatların təlim proqramının iştirakçıları üçün iyulun 15-də Azərbaycanın Niderlanddakı səfirliyində “dəyirmi masa” keçirilib.
Səfirlikdən AZƏRTAC-a bildiriblər ki, tədbirdə Azərbaycandan və Gürcüstandan gənc diplomatlar, Klingendal Beynəlxalq Əlaqələr İnstitutunun professorları, bu ölkədə fəaliyyət göstərən aparıcı diaspor təşkilatlarının, eləcə də Benilüks Azərbaycanlıları Konqresinin üzvləri, Niderlandda yaşayan gənc azərbaycanlı mütəxəssislər və səfirliyin əməkdaşları iştirak ediblər.
Səfirliyin müşaviri Aliyə Ağazadə tədbirdə Azərbaycanın xarici siyasətinin uğurlarından danışıb. O, həmçinin iyulun 7-də Xarici İşlər Nazirliyində keçirilmiş Azərbaycan Respublikasının diplomatik xidmət orqanları rəhbərlərinin beşinci müşavirəsindən bəhs edib. İştirakçılar müşavirədə Prezident İlham Əliyevin diplomatlarımız qarşısında qoyduğu vəzifələr barədə məlumatlandırılıb, Azərbaycan diplomatiyasının prinsipial və müstəqil olması, ölkəmizlə əməkdaşlıq etmək istəyən dövlətlərin sayının artması, Azərbaycanın müsbət beynəlxalq imici və dünyada özünü etibarlı dost və tərəfdaş kimi təsdiq etməsi, uğurlu enerji siyasəti və bu xüsusda digər vacib məqamlara toxunulub. Bundan əlavə, ölkənin daxili, xarici, iqtisadi, sosial inkişafı, ordu quruculuğu sahəsində düşünülmüş konseptual yanaşmaya söykənən siyasətinin uğurları xüsusi vurğulanıb.
Həmçinin tədbir iştirakçılarına Azərbaycanın iqtisadi sahədə əldə etdiyi uğurlar, regionların inkişafı, əsaslı quruculuq işləri, ölkədə həyata keçirilən gənclər siyasəti və bu sahədə reallaşdırılan proqramlar haqqında da ətraflı məlumat verilib.
Daha sonra Cənubi Qafqaz regionunda təhlükəsizlik məsələləri, regiondakı münaqişələr, xüsusilə Ermənistan-Azərbaycan, Dağlıq Qarabağ münaqişəsi və hazırda problemin həlli istiqamətində aparılan işlər “dəyirmi masa” iştirakçılarının diqqətinə çatdırılıb. Qeyd edilib ki, Cənubi Qafqazda mövcud münaqişələr regionda sülh və təhlükəsizliyə başlıca təhdiddir.
İştirakçılar həmin münaqişələrin beynəlxalq hüququn prinsipləri - ərazi bütövlüyü və sərhədlərin toxunulmazlığı prinsiplərinin rəhbər tutularaq həllinin vacibliyi vurğulayıblar.
“Dəyirmi masa”nın iştirakçıları, həmçinin “YARAT” Müasir İncəsənət Məkanı ilə birlikdə iyunun 28-də və iyulun 18-də səfirlikdə təşkil olunmuş gənc azərbaycanlı fotoqraf Nəzrin Məmmədovanın əsərlərindən ibarət sərgiyə baxıblar.
Tədbirdə Azərbaycanın tarixinə və mədəniyyətinə həsr olunmuş film nümayiş etdirilib, ziyafət verilib.
Bölmənin digər xəbərləri
