ÇERNOBIL QƏZASININ 20 İLLİYİNƏ HƏSR OLUNMUŞ KONFRANS KEÇİRİLMİŞDİR
Onlar, əvvəlcə, Fəxri xiyabana gələrək, ulu öndər Heydər Əliyevin xatirəsini ehtiramla yad etmiş, abidəsi önünə əklil qoymuşlar.
Tədbir iştirakçıları Şəhidlər xiyabanını da ziyarət etmiş, Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anaraq, “Əbədi məşəl” abidəsinin önünə əklil qoymuşlar.
Sonra Azərbaycan Həmkarlar İttifaqları Konfederasiyasının binasında qəzanın nəticələri aradan qaldırılarkən zərər çəkənlərin problemlərinə həsr olunmuş konfrans keçirilmişdir. Azərbaycanın Dövlət himni səsləndikdən sonra xalqımızın dahi oğlu, dünya şöhrətli siyasi və dövlət xadimi Heydər Əliyevin, şəhidlərin və Çernobıl qəzasının fəsadlarından dünyasını dəyişənlərin xatirəsi ehtiramla yad olunmuşdur.
İttifaqın sədri Mirhəsən Həsənov qəzanın səbəblərindən, faciəli nəticələrindən, əlillərin üzləşdikləri problemlərdən və hazırda onlara göstərilən dövlət qayğısından danışmışdır.
Qeyd olunmuşdur ki, qəzanın nəticələrinin aradan qaldırılmasında Azərbaycandan 7 min nəfər iştirak etmiş və ötən 20 il ərzində onlardan 2 mini müxtəlif xəstəliklərdən dünyasını dəyişmişlər.
Tədbirdə Prezidentin İcra Aparatının ictimai-siyasi şöbəsi müdirinin müavini Ərəstun Mehdiyev, əmək və əhalinin sosial müdafiəsi nazirinin müavini Tahir Budaqov, Dövlət Sosial Müdafiə Fondu sədrinin müavini Zakir Babayev və digərləri iştirak etmişlər.
