DÜNYA
Çexiya koronavirusa qarşı öz peyvəndini hazırlayır
Bakı, 4 may, AZƏRTAC
Çexiyada pandemiyanın ikinci və üçüncü dalğası ehtimalları nəzərə alınaraq koronavirusa qarşı peyvəndin hazırlanması üzrə çalışmalar davam edir.
AZƏRTAC xəbər verir ki, bu barədə Çexiyanın Səhiyyə naziri Adam Voytex mayın 4-də təşkil olunan mətbuat konfransında məlumat verib.
“Vaksinin hazırlanması üzərində üç qurumun - Dövlət Səhiyyə İnstitutunun, Gematologiya İnstitutunun, Klinik və Eksperimental Tibb İnstitutunun alimləri çalışırlar. Hazırda çalışmaların ilk, laboratoriya fazası gedir”, - deyə nazir bildirib.
Tədqiqatın elmi rəhbərlərdən biri olan kardioloq Vera Adamkovanın sözlərinə görə, Çexiyada COVID-19 əleyhinə vaksinin hazırlanması üzərində işlər cari ilin fevral ayından başlayıb və hazırda dünyada 80-nə yaxın laboratoriya bu cür tədqiqatlarla məşğul olur.