Çexiyada valyutadəyişmə məntəqələri ciddi nəzarət altındadır
Praqa, 21 iyun, AZƏRTAC
Uzun müddətdir ki, Çexiyada valyutadəyişmə məntəqələrinin sayı azalır.
AZƏRTAC Çexiya Milli Bankının (CNB) maliyyə bazarlarına nəzarətə dair bu gün açıqladığı hesabatın nəticələrinə istinadla xəbər verir ki, ötən il onların sayı 12 ədəd azalıb. Hazırda ölkədə ümumilikdə 829 valyutadəyişmə məntəqəsi fəaliyyət göstərib. 2017-ci ildə Çexiya bazarında 1000-dən çox valyutadəyişmə məntəqəsi olduğu halda, 2010-cu ildə CNB təxminən 1460 belə obyektə nəzarət edib. 2024-cü ildə banka çoxlu sayda şikayətlər də daxil olub. Onların bir qismi zərərli mübadilə əməliyyatları ilə bağlıdır. Müvafiq icazəsi olmayan valyutadəyişmə məntəqələri yoxlanılıb və onların sahibləri məsuliyyətə cəlb edilib.
CNB valyutadəyişmə məntəqələrində yoxlamaları əsasən müştərilərin şikayətləri və ya Maliyyə Analitik İdarəsi kimi dövlət qurumlarından gələn siqnallar əsasında həyata keçirib. İctimaiyyət daha çox istehlakçıların öhdəlik və hüquqlarının mümkün pozulması hallarından şikayətlənsə də, dövlət qurumları “çirkli pulların yuyulmasına” qarşı mübarizə tədbirlərinə əməl edilməməsinə və ya müvafiq icazələr olmadan mübadilə fəaliyyətinin həyata keçirilməsinə diqqət yetirir.
Mərkəzi Bank nəzarətçiləri əsasən “gizli alıcı” adlanan sınaq valyuta alış-satışı metodundan istifadə edirdilər. Onlar bir neçə meyarı - valyutadəyişmə məntəqələrinin öz müştərilərini müəyyən edib-etmədiyini və onlara nəzarət edib-etmədiyini; düzgün və tam məlumat dərc olunması; əməliyyatın ləğvi halında pulun düzgün qaytarılmasını yoxlayıblar.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
