Çinin avtomobil ixracı artıb
Bakı, 3 aprel, AZƏRTAC
“China Merchants Energy Transport” (“China Merchants Group”un törəmə şirkəti) metanolla işləyə bilən ikiyanacaqlı avtomobil daşıyıcılarının tikintisini sifariş verib.
AZƏRTAC xarici KİV-lərə istinadla xəbər verir ki, “China Merchants Industry” ilə bağlanan müqavilə ümumi dəyəri 192 milyon dollar olan 9,3 min avtomobil tutumlu iki gəminin tikintisini, həmçinin metanol yanacağı ilə işləyən 384 milyon dollar dəyərində daha dörd avtomobil daşıyıcısının tikintisi variantını nəzərdə tutur.
İlk iki gəminin 2026-cı ilə qədər, qalanlarının isə 2026-cı il ərzində istismara verilməsi planlaşdırılır.
Son beş ildə bu sektorda sifarişlərin sayı məhdud, donanmanın orta yaşı isə 20 il idi. 2021-ci ildə 38 avtomobil daşıyıcısı sifariş edilsə də, 2022-ci ildə bu göstərici 90 olub.
“Clarkson Research”ə görə, sifariş artımı bu il də davam edəcək və artıq 17 avtomobil daşıyıcısı sifariş edilib.
2022-ci ildə Çinin avtomobil ixracı 3,1 milyona çatıb ki, bu da əvvəlki illə müqayisədə 54 faiz çoxdur. 2021-ci ildə ölkədən ixrac ilk dəfə olaraq 2 milyon avtomobili keçib.
Bölmənin digər xəbərləri
