ÇİYİD SƏPİNİNƏ BAŞLANMIŞDIR
Kürdəmir rayonunda bir neçə gündür ki, pambıq əkini kampaniyası davam etdirilir. Pambıqçılıqla məşğul olan torpaq mülkiyyətçiləri hər yerdə səpinə ciddi hazırlıqlı başlamışlar. Rayon icra hakimiyyətinin aqrar şöbəsindən AZƏRTAC-ın müxbirinə bildirmişlər ki, regionların sosial-iqtisadi inkişafı Dövlət Proqramı çərçivəsində son illər təsərrüfatın pambıqçılıq kimi ənənəvi sahəsinin genişləndirilməsi istiqamətində həyata keçirilən tədbirlər artıq bəhrəsini verməkdədir. Cari mövsümdə çiyid əkini sahələri azı 2500 hektara çatdırılacaqdır. Əkin kampaniyasında 16 malaçəkən traktor, bir o qədər də səpin aqreqatı iştirak edir. Vaxtında keyfiyyətli şum çıxarılmış və kifayət qədər toxum tədarük edilmiş, texnika sazlanaraq start vəziyyətə gətirilmişdir. Köhünlü, Yenikənd, Şilyan, Muradxan kənd, Qarabucaq qəsəbə ərazi bölgələrində çiyid səpini daha mütəşəkkil aparılır. Hava şəraiti əlverişli keçərsə, əkin kampaniyası bir neçə günədək başa çatdırılacaqdır.
Bölmənin digər xəbərləri
