COVID-19 infeksiyasının konyunktivitlə başlaması da mümkündür
Bakı, 14 aprel, AZƏRTAC
Yüksək hərarət, öskürək, halsızlıq kimi əlamətlərlə xarakterizə olunan koronavirus infeksiyası digər hallarla da özünü büruzə verir.
Respublika Neyrocərrahiyyə Xəstəxanasının həkim-oftalmoloqu Gültəkin Məmmədova bu barədə AZƏRTAC-a deyib: “Gözə infeksiyanın düşməsi əsasən əllərlə təmas zamanı yaranır. Ona görə də əllərin təmizliyi xüsusi olaraq qeyd edilir. Lakin təkcə təmas zamanı deyil, hava-damcı yolu ilə də konyunktivitə yoluxmaq mümkündür. Yuxarı tənəffüs yollarına keçən COVID-19 infeksiyası da əvvəlcə konyunktivitlə başlaya bilər. Yəni hərarət, halsızlıq olmadan və heç bir şikayətsiz konyunktivit infeksion xəstəliyin ilk əlaməti kimi meydana çıxa bilər”.
Virusdan qorunmağa çalışsaq da, yoluxma ehtimalı qaçılmazdır. Vacib məqamlardan biri də əlamətlərin gözlərdə necə hiss olunması ilə əlaqədardır: “Gözlərdə yad cisim hissiyyatı, yüngül qızartı, az da olsa selik şəklində ifrazat, yaxud qapaqlarda şişkinlik olması konyunktivitin başlandığının göstəricisidir”.
Həkim-oftalmoloq deyir ki, gözləri qorumaq üçün eynəkdən istifadə hava-damcı yolu ilə yoluxma zamanı baryer rolu oynaya bilər. Lakin yuxarı tənəffüs yollarından yoluxan COVID-19 infeksiyası da konyunktivit şəklində özünü göstərə bilər. Ona görə də maskadan istifadə edilməli, gigiyenik qaydalara ciddi riayət olunmalıdır. Zərurət olmadığı halda evdən çıxmamaq məsləhətdir.
Bölmənin digər xəbərləri
