“Dəmir yumruq” əməliyyatı bütün dünyaya münaqişənin ədalətli həll yolunun olduğunu göstərdi
Bakı, 7 noyabr, AZƏRTAC
8 Noyabr - Zəfər Günü müstəqil Azərbaycan dövlətinin ən şanlı tarixlərindən biridir. 2020-ci il sentyabrın 27-də Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusu Ermənistanın ardıcıl təxribatlarının və yeni işğal planlarının qarşısını almaq, işğal altında olan torpaqlarımızı azad etmək məqsədilə başladığı zəfər yürüşündə möhtəşəm uğurlar əldə etdi. Müzəffər Azərbaycan Ordusunun 44 gün davam edən şanlı yürüşü qələbə ilə başa çatdı.
Bu fikirləri AZƏRTAC-a açıqlamasında AMEA-nın Tarix və Etnologiya İnstitutunun elmi işçisi Yaqut Məmmədova deyib. O bildirib ki, noyabrın 8-də Qarabağın tacı Şuşa şəhərinin azad edilməsi dünya hərb tarixinə düşəcək unikal hərbi əməliyyatlardandır.
“Şuşanın düşmən işğalından azad edilməsi müharibənin taleyində həlledici rol oynayıb. Şanlı Zəfərimiz qürur mənbəyimizdir. Bu qələbənin əldə edilməsi təcrübəsi hazırda dünyanın qüdrətli dövlətlərinin ali hərbi məktəblərində öyrənilir. Bütün bunlar Ermənistanın kapitulyasiyası ilə nəticələndi. Döyüş meydanında tarix yazan ordumuz Ermənistanı məğlubiyyətə uğradaraq 30 illik işğala son qoydu. Dövlətimizin ərazi bütövlüyünün təmin edilməsi ilə yanaşı, erməni şovinizminə və ekspansionizminə sarsıdıcı zərbə endirildi. Prezident İlham Əliyevin müvafiq Sərəncamı ilə hər il noyabrın 8-i Zəfər Günü kimi təntənəli şəkildə qeyd edilir”, - deyə Yaqut Məmmədova əlavə edib.
İnstitutun əməkdaşı vurğulayıb ki, Ali Baş Komandan İlham Əliyev Vətən müharibəsi dövründə bütün təzyiqlərə mətanətlə sinə gərdi və “Dəmir yumruq” əməliyyatı ilə bütün dünyaya münaqişənin ədalətli həll yolunun olduğunu göstərdi: “Nəticədə ölkəmiz BMT Təhlükəsizlik Şurasının münaqişə ilə bağlı məlum dörd qətnaməsini özü icra etdi. Müzəffər Ali Baş Komandanın rəhbərliyi, ordumuzun gücü, əsgərlərimizin rəşadəti, vətən sevgisi, xalqımızın birliyi parlaq qələbəni təmin etdi. Azərbaycan Respublikası yalnız Ermənistanı deyil, həmçinin dünya erməniliyini və onun havadarlarını məğlub etdi.
Qarabağ iqtisadi rayonunda lokal antiterror əməliyyatı nəticəsində münaqişəyə son qoyuldu. Oktyabrın 15-də Prezident İlham Əliyev Ağdərə, Xocalı, Xocavənd, Xankəndi şəhərlərində, Əsgəran qəsəbəsində, Sərsəng su anbarı ərazisində Azərbaycanın Dövlət Bayrağını ucaltdı. Bununla da Azərbaycan Respublikasının ərazi bütövlüyü bütünlüklə bərpa edildi.
Müstəqil Azərbaycan dövləti Ali Baş Komandanın və rəşadətli ordumuzun qazandığı qələbə ilə öz gücünü dünyaya sübut edərək regionda yeni reallıqlar yaratdı. Bu gün Azərbaycanın öz suverenliyini bərpa etməsi bir çox dövlətlər üçün nümunədir. Ərazi bütövlüyünün təmin olunması regionda davamlı sülhün, təhlükəsizliyin təmin olunmasına xidmət edir və beynəlxalq hüququn norma və prinsiplərinə əsaslanır”.
Bölmənin digər xəbərləri
