Dəniz quldurları tərəfindən əsir götürülən altı dənizçi azad edilib
Bakı, 8 may, AZƏRTAC
Mart ayında Qvineya körfəzində dəniz quldurları tərəfindən hücuma məruz qalan “Monjasa Reformer” tankerinin əsir götürülmüş altı dənizçisi Nigeriyada azad edilib.
AZƏRTAC France-Presse agentliyinə istinadla xəbər verir ki, bu barədə gəminin sahibi - Danimarkanın “Monjasa” kompaniyası məlumat yayıb. Dənizçilərin şəxsi məlumatları, o cümlədən vətəndaşlığı, həmçinin onların azad edilməsinin təfərrüatları açıqlanmır.
Dəniz quldurları Liberiya bayrağı altında üzən və dizel yanacağı daşıyan “Monjasa Reformer” tankerinə martın 25-də Konqo Respublikasının cənub sahilində Pointe-Noire limanından 260 kilometr məsafədə hücum etmişdi. Hadisə zamanı gəminin göyərtəsindəki 16 ekipaj üzvünün bir hissəsi əsir götürülmüşdü.
Bir müddət öncə Litva hökumətinin mətbuat xidməti Afrika sahillərində əsir götürülən iki litvalı dənizçinin pul müqabilində geri qaytarıldığını bildirib.
Afrikanın sahilyanı ölkələri son iki il ərzində dənizlərin təhlükəsizliyinin təmin olunması istiqamətində xeyli səylər göstərib. Buna baxmayaraq, Qvineya körfəzi quldurluq baxımından ən təhlükəli zona olaraq qalır. Beynəlxalq Dəniz Bürosu ötən il həmin rayonda 19 quldurluq hadisəsi qeydə alıb. 2021-ci ildə körfəz sularında 35 gəmiyə, 2020-ci ildə isə 84 gəmiyə hücum edilib.
Bölmənin digər xəbərləri
