Deputat: Ölkəmizin ərazi bütövlüyünü qorumaq və təhlükəsizliyi təmin etmək Azərbaycanın suveren hüququdur
Bakı, 13 sentyabr, AZƏRTAC
Son bir aydır ki, erməni hərbi birləşmələri Azərbaycan-Ermənistan sərhədində davamlı şəkildə təxribatlara əl atır. Təbii ki, düşmənin hər bir təxribatına qarşı çox ciddi cavab tədbirləri görülür. Azərbaycan Ordusu ölkəmizin ərazi bütövlüyünü və təhlükəsizliyini göz bəbəyi kimi qoruyur. Sentyabrın 12-də Ermənistan növbəti genişmiqyaslı hərbi təxribata əl atdı. Cavabımız bu dəfə də onlar üçün çox ağır oldu.
Bu fikirləri AZƏRTAC-a açıqlamasında Milli Məclisin deputatı Azər Badamov deyib.
O qeyd edib ki, Ermənistanın belə təxribatlara əl atmasında bir neçə məqsədi var. Birinci məsələ odur ki, üçtərəfli danışıqlarla əldə olunmuş razılaşmalara əsasən, Ermənistan sülh müqaviləsinin bağlanması üçün məcbur vəziyyətə salınıb. Avropa İttifaqı Şurasının prezidentinin təşəbbüsü ilə keçirilmiş son Brüssel görüşündə sülh müqaviləsinin bağlanması üçün konkret məsələlər müzakirə olunub və Ermənistan bu istiqamətdə müəyyən addımlar atmalıdır. Baş vermiş təxribat onu göstərir ki, Ermənistan sərhədlərin delimitasiyası və demarkasiyası prosesini gündəmdən çıxararaq sülh müqaviləsinin bağlanması ilə bağlı aparılmış danışıqların nəticələrini heçə endirməyə çalışır. Çox təəssüf ki, Ermənistan sülh müqaviləsinin alternativi olmadığını hələ də başa düşmür və odur ki, törətdiyi təxribatlara görə ağır cəzalanır.
İkinci səbəb Ermənistanın müstəqil ölkə olmamasıdır. Bəzi xarici qüvvələr Ermənistana havadarlıq edərək dəstək verir və regionda sabitliyin yaranmasını istəmirlər. Çünki ölkələrimiz arasında sülh müqaviləsinin bağlanması Zəngəzur dəhlizin açılmasına xidmət etməlidir və bu, Avropa ilə Asiya arasında iqtisadi baxımından yeni, daha səmərəli nəqliyyat dəhlizi formalaşdırır. Bu gün Ermənistana dayaq duraraq Azərbaycana qarşı təxribatlara dəstək verən qüvvələr Zəngəzur dəhlizinin açılmasına mane olmağına çalışırlar. Təxribatların məhz ölkələrimiz arasındakı sərhəddə törədilməsinin səbəbi isə bu məsələyə beynəlxalq ictimaiyyətin diqqətin cəlb edilməsidir. Bu, Ermənistanın növbəti hərbi avantürasıdır.
Ermənistanın Azərbaycanın bütün cavab tədbirlərini öz ərazisi bütövlüyü çərçivəsində apardığını hələ də anlamadığını vurğulayan deputat qeyd edib: “Ölkəmizin ərazi bütövlüyünü qorumaq və təhlükəsizliyi təmin etmək beynəlxalq hüquq normalarına əsasən Azərbaycanın suveren hüququdur və Ordumuzun gördüyü hər bir cavab tədbiri düşmənin ərazilərimizə girməsi cəhdinin qarşısının alınmasına yönəlib. Azərbaycan işğaldan azad edilmiş ərazilərdə basdırılmış minaların təmizlənməsi işini davam etdirdiyi halda və beynəlxalq konvensiyalara əsasən, minaların basdırıldığı ərazilərin xəritələrini bizə vermək əvəzinə, Ermənistan yeni ərazilərimizi minalamağa çalışır. O cümlədən nəzarətə götürdüyümüz Laçında basdırılmış minalar ötən ilin istehsalıdır. Son təxribatın məqsədlərindən biri də ordumuzun mövqelərinə gedən təminat yollarının minalanması, bununla da hərbçilərimizə və mülki əhalimizə qarşı yenidən mina terroru törətmək cəhdidir. Ermənistanın bu hərəkətləri beynəlxalq hüququn bütün normalarına ziddir. Düşmənin bu cinayətkar hərəkətləri Azərbaycanı sərhəddə təhlükəsiz bufer zonası yaratmağa məcbur edir”.
A.Badamov vurğulayıb ki, Ermənistanın təxribatlara əl atmaqda digər məqsədi isə işğaldan azad edilmiş ərazilərdə Azərbaycanın apardığı genişmiqyaslı yenidənqurma və bərpa işlərini ləngitmək cəhdidir. Lakin Azərbaycanın güclü ordusu var və rəşadətli Silahlı Qüvvələrimiz düşmənin bütün təxribatlarına cavab verməyə hazırdır və qadirdir.
Bölmənin digər xəbərləri
