Deputat: “Təmiz şəhər” modelinin rayonlara daşınmasına ehtiyac var
Bakı, 6 noyabr, AZƏRTAC
“Təmiz şəhər” modelinin inkişaf etdirilərək rayonlara daşınmasına ehtiyac var.
AZƏRTAC xəbər verir ki, bunu Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov noyabrın 6-da Milli Məclisin komitələrinin birgə iclasında deyib.
O bildirib ki, iqlim dəyişiklikləri, qlobal istiləşmə, su ehtiyatlarının məhdudluğu, təbii sərvətlərdən səmərəsiz istifadə, meşə ərazilərinə qeyri-qanuni müdaxilələr, təbii antropogen təsirlər nəticəsində yaranan hadisələr bu sahəyə xüsusi diqqət ayırmağa əsas verir. “Xüsusən də su resurslarından səmərəli istifadəni önə çıxarmalıyıq. Çünki qarşıda dünyanı, o cümlədən Azərbaycanı su ilə bağlı təhdidlər gözləyir. Azərbaycan azsulu ölkələrdən biridir. Adambaşına düşən su sərfiyyatına görə qonşu ölkələrdən geri qalır. Qarşıda əhalinin suya olan tələbatın artması və şoranlaşmış torpaqlarımızın yenidən iqtisadiyyatın dövriyyə zəncirinə qayıtması ilə suya tələbat da artacaq. Amma bu sahədə su istifadəçiləri birliyi ilə hökumət arasında münasibətlərə yenidən baxılmalıdır. Yəni, burada çoxlu narahatlıqlar var və bu sahəyə də xüsusi diqqət ayrılmasını şərtləndirmək lazımdır”, - deyə komitə sədri əlavə edib.
Bölmənin digər xəbərləri
