DEPUTATIMIZ ERMƏNİSTANIN AŞ-DƏN KƏNARLAŞDIRILMASINI TƏLƏB EDƏN SƏNƏD HAZIRLAMIŞDIR
AZƏRTAC-ın xüsusi müxbiri xəbər verir ki, AŞPA-nın payız sessiyasının ilk iş günündə R.Hüseynov hazırladığı daha bir sənədi Avropa Şurasının katibliyinə təqdim etmişdir. Nazirlər Komitəsinə ünvanlanmış bu sənəd yazılı sual formasında tərtib olunmuşdur. “Ermənistan Respublikasının Avropa Şurası üzvlüyündən çıxarılması haqqında” adlı sənəddə deyilir:
“Hər bir təşkilat öz nüfuzunu qorumalı, tribunasından onun prinsiplərinə zidd olan bəyanatların verilməsinə, sıralarında onun müəyyən etdiyi standartlara və qaydalara riayət etməyənlərin olmamasına səy göstərməlidir. Bu, şübhəsiz ki, yalnız Avropada deyil, bütün dünyada xüsusi hörmətə və çəkiyə malik Avropa Şurası kimi mötəbər təşkilata ilk növbədə aiddir.
Ermənistan Prezidenti R.Koçaryan AŞPA-nın yay sessiyasında çıxış etdi və suallara cavab verdi. Onun qurumun tribunasından elan etdiyi bir çox fikirlər demokratiya, insan haqları prinsipləri ilə tam ziddiyyət təşkil edirdi. Ermənistanda mətbuatın vəziyyətinin mürəkkəb olması, azad mətbuata təzyiqlərin mövcudluğu barədə çoxlu konkret faktlar məlumdur və AŞPA-da bu barədə sənədlər də hazırlanıb, müzakirələr də gedibdir. Lakin R.Koçaryan bütün bunları dandı və AŞPA-nı onun ölkəsinin daxili işlərinə qarışmaqda ittiham etdi. Eyni zamanda, Ermənistan Prezidenti ölkəsində ayrı-ayrı insanlara qarşı dövlət tərəfindən törədilən zorakılıqlarla bağlı AŞPA-nın narahatlığına və tənqidlərinə görə də bu qurumu tənqid etdi, AŞPA-nın bu məsələlərə münasibət bildirməsini də anlaşılmaz məntiqlə Ermənistana təzyiq kimi mənalandırdı.
Avropa Şurasının üzvü olan digər dövlətin – Azərbaycanın ərazilərinin 20 faizinin işğal edilməsində, 1 milyon insanın qaçqın və məcburi köçkünə çevrilməsində xüsusi rol oynayan R.Koçaryan AŞPA-nın bu il iyun ayının sonlarında keçirilmiş sessiyanın tribunasından konkret olaraq Şuşa şəhərinin zəbt edilməsində və Xocalı şəhərində yüzlərlə dinc vətəndaşın qətlə yetirilməsində bilavasitə iştirak etməsi ilə iftixar duyduğunu etiraf etdi.
Dörd il ərzində AŞ-nin üzvü olan Ermənistan Respublikası sistematik olaraq bu qurumun prinsiplərinə tamam əks olan fəaliyyətlər göstərmişdir.
Ermənistanın işğal altında saxladığı nəzarətsiz ərazilərdə narkotik maddələr yetişdirilməsi və onların tranziti ilə məşğul olması, nəzarətsiz bölgələrdə terrorçular hazırlayan düşərgələrin yerləşdirilməsi, bir sıra qonşu ölkələrlə əməkdaşlıq şəraitində nüvə tədqiqatları aparması və nüvə tullantılarını işğal etdiyi ərazilərdə basdırması, regionun ekologiyasına ciddi ziyan vuran işlər görməsi, qəza vəziyyətində olan və ikinci Çernobıla çevrilə biləcək Metsamor atom elektrik stansiyasını dayandırmaqdan tamamilə boyun qaçırması haqqında AŞPA-da dəfələrlə sənədlər hazırlanıbdır. Ermənistanda yaranmış dözülməz iqtisadi və antidemokratik şərait üzündən ölkə əhalisinin üçdən iki hissəsi Ermənistanı tərk etmişdir”.
Bütün bunları nəzərə alaraq deputat Rafael Hüseynov Nazirlər Komitəsinə sualla müraciət edir: “Avropa Şurasının Nizamnaməsində bu qurumun qaydalarına və prinsiplərinə əməl etməyən dövlətə qarşı sanksiyalar nəzərdə tutan ayrıca maddə var və Ermənistan da bu qanunazidd fəaliyyətlərini sistemli və nümayişkaranə şəkildə davam etdirməkdədir. Nazirlər Komitəsi AŞPA-nın prinsiplərinə əks gedən Ermənistanın bu təşkilatdan kənarlaşdırılması üçün Nizamnamənin tələbini yerinə yetirmək üçün hansı tədbirlər görə bilər?”
