“DİPLOMATİYA ALƏMİ” JURNALININ TƏQDİMAT MƏRASİMİ KEÇİRİLMİŞDİR
İyulun 15-də Beynəlxalq Mətbuat Mərkəzində Azərbaycan Respublikası Xarici İşlər Nazirliyinin “Diplomatiya aləmi” jurnalının 1-ci və 2-ci nömrələrinin təqdimat mərasimi keçirilmişdir. Azərbaycanın xarici işlər naziri Vilayət Quliyev mərasimi açaraq tədbir iştirakçılarını və xarici dövlətlərin ölkəmizdəki səfirlərini salamladı. Sonra natiq jurnalın dərc olunması zərurətindən və onun qarşısında duran vəzifələrdən danışdı. Bildirdi ki, Azərbaycan diplomatiyasının tarixi onun dövlətçiliyinin tarixi ilə yaşıddır. Qədim dövrlərdə və orta əsrlərdə diplomatiya tariximizin bir sıra yaddaqalan səhifələri yazılmışdır. Lakin buna baxmayaraq, bu gün Xarici İşlər Nazirliyi belə hesab etdi ki, “Diplomatiya aləmi” jurnalının çap olunmasına ehtiyac vardır. Biz bu jurnal vasitəsilə gördüyümüz işləri, qarşımızda duran vəzifələri həm xalqımıza, həm də dünya ictimaiyyətinin diplomatiya aləminə təqdim etmək imkanı qazanırıq. Xüsusilə Azərbaycan kimi yeni müstəqillik əldə etmiş dövlət üçün belə bir jurnalın nəşri daha vacib idi. Nazir dedi ki, biz bu jurnalı çap etməklə bir tərəfdən özümüzün diplomatiya tariximizi öyrənirik, digər tərəfdən isə yetişməkdə olan diplomatlarımıza öz töhfəmizi vermək istəyirik. Bu gün dünyada hər şeydən öncə informasiya mübadiləsinə ehtiyac vardır. Azərbaycan həqiqətlərini dünyaya yaymaq üçün bu jurnal bizə böyük imkanlar yaradacaqdır. Natiq bildirdi ki, ildə 4 nömrəsini çap etmək istədiyimiz “Diplomatiya aləmi” jurnalı Azərbaycan diplomatiyasının tarixindən və bu günündən, beynəlxalq siyasətin aktual problemlərindən, xarici siyasətlə bağlı nəzəri və təcrübi məsələlərdən bəhs edəcəkdir. Bir sözlə, diplomatiya ilə bağlı bütün məsələləri jurnalın səhifələrində geniş və hərtərəfli işıqlandırmağa çalışacağıq. Həm respublikamızın Prezidentinin bu sahədə gördüyü genişmiqyaslı və çoxşaxəli işlər, həm Xarici İşlər Nazirliyinin fəaliyyəti, həm də müxtəlif xarici ölkələrdəki və beynəlxalq qurumlar yanındakı missiyalarımızın işləri jurnalın səhifələrində ətraflı işıqlandırılacaqdır. Prezidentin İcra Aparatının xarici əlaqələr şöbəsinin müdiri, “Diplomatiya aləmi” jurnalı baş redaktorunun birinci müavini Novruz Məmmədov qeyd etdi ki, bu gün təqdimatına toplaşdığımız dərgi Xarici İşlər Nazirliyinin həyatında, eyni zamanda Azərbaycan diplomatiyasında və xarici siyasətində mühüm bir hadisədir. Dövlətimizin başçısının xeyir-duası ilə işıq üzü görən “Diplomatiya aləmi” jurnalının artıq 2 nömrəsi oxucuların ixtiyarına verilmişdir. Bu nömrələr jurnalın ilk addımlarıdır. Lakin buna baxmayaraq, jurnal peşəkarlıq baxımından bütün iddialara layiqdir. Azərbaycanda bu gün diplomatiya haqqında kitablar, qəzet və jurnal məqalələri olsa da, sistemləşmiş formada belə bir jurnala ehtiyac böyük idi. Düşünürəm ki, bundan sonra Azərbaycanın xarici siyasətinin əsas aparıcı xətti öz əksini bu jurnalda tapacaqdır. Eyni zamanda, jurnal xarici siyasət və diplomatiya sahəsində bir növ bizim ruporumuza çevriləcəkdir. N.Məmmədov jurnalın perspektivlərindən danışarkən dedi ki, məcmuəni daha gözəl, daha maraqlı etmək üçün bir çox işlər görülməlidir. Azərbaycanın indiki vəziyyətini nəzərə alsaq, jurnalın əlavəsini daha yığcam şəkildə dünya ölkələrinə yaymaq mühüm əhəmiyyət kəsb edərdi. İnanıram ki, jurnal həm də Azərbaycan diplomatlarının və siyasətlə məşğul olan kadrlarının daha çox peşəkarlaşmasında mühüm rol oynayacaqdır. Eyni zamanda o, diplomatiya və siyasət sahəsində tədqiqat əsərlərinin daha yüksək səviyyədə hazırlanmasında istiqamətverici vasitəyə çevriləcəkdir. Natiq bildirdi ki, xarici işlər nazirliyinin tarixində ilk dəfə yaradılan belə bir jurnalın oynadığı rol zamanla müəyyənləşəcəkdir. Mən jurnalın yaradıcılarına müvəffəqiyyətlər arzulayıram. Burada iştirak edən siyasət adamlarını, eləcə də xarici səfirliklərin nümayəndələrini jurnalın həyatında fəal iştirak etməyə çağırıram. Prezidentin İcra Aparatının ictimai siyasət şöbəsinin müdiri Əli Həsənov dedi ki, Azərbaycanda fəaliyyət göstərən diplomatik korpus və respublikamızın diplomatiya aləmi bu jurnalın timsalında sanballı bir töhfə əldə edib. Çoxdan idi ki, ölkəmizdə belə bir jurnala ehtiyac duyulurdu. Diplomatiya elmi başqa elmlərdən daha çox özünün praktikliyi ilə seçilir. Yəni bir tərəfdən beynəlxalq münasibətlər, dövlətlərarası əlaqələr öyrənilir, bu əlaqələr getdikcə təkmilləşdirilir, o biri tərəfdən bu əlaqələrə yeni-yeni nümunələr, inkişaf əlamətləri qatılır. Natiq vurğuladı ki, 11 ildir Azərbaycan beynəlxalq münasibətlərin subyektidir. Bu illərdə dövlətlərarası münasibətlərdə kifayət qədər təcrübə və metodoloji konseptual baza formalanmışdır. Güman edirəm ki, jurnal bu sahənin tədqiqatçıları üçün, eyni zamanda praktiki fəaliyyətlə məşğul olan diplomatlar üçün əsl diskussiya tribunasına çevriləcəkdir. Ə.Həsənov dedi ki, diplomatiya praktiki elmdir. Gündəlik fəaliyyət, ünsiyyət, münasibət tələb edir. İnanıram ki, respublikamızın xarici siyasətini bütün dünyada həyata keçirən qurumlar, səfirliklər, eyni zamanda xarici ölkələrin Azərbaycanda akkreditə olunmuş diplomatik mərkəzləri arasında bu jurnal ünsiyyət, gündəlik əlaqə vasitəsinə çevriləcəkdir. Mən öz adımdan bildirirəm ki, Prezidentin İcra Aparatı da bu jurnalla çox yaxından əməkdaşlıq edəcəkdir. Təqdimat mərasimində Ukraynanin Azərbaycandakı səfiri Boris Aleksenko, Gürcüstanın səfiri Zurab Qumberidze, Milli Məclisin deputatı, tarix elmləri doktoru Cəmil Həsənli, BDU-nun dosenti Hicran Hüseynova çıxış edərək Azərbaycan diplomatiyası tarixinin öyrənilməsində, tədqiqində, onun beynəlxalq aləmə çatdırılmasında, siyasətlə məşğul olan kadrların yetişdirilməsində jurnalın mühüm əhəmiyyətindən danışdılar. Onun baş redaktoru, xarici işlər naziri Vilayət Quliyevə və yaradıcı kollektivə uğurlar arzuladılar. Mərasimdə xarici ölkələrin Bakıdakı diplomatik korpusunun nümayəndələri, Milli Məclisin deputatları iştirak edirdilər.
Bölmənin digər xəbərləri
