ELM VƏ TƏHSİL
Doğu Akdeniz Universitetinin nümayəndələri Naxçıvanda olmuşlar
Bakı, 26 noyabr (AZƏRTAC). Şimali Kiprin və Avropanın qabaqcıl universitetlərindən biri olan Doğu Akdeniz Universitetinin (DAU) Azərbaycanın bir çox ali təhsil ocağı ilə əməkdaşlığı davam edir. Qarşılıqlı əməkdaşlığın davamı olaraq DAU-nun nümayəndələri Naxçıvana gəlmişlər.
NDU-dan AZƏRTAC-a bildirmişlər ki, məqsəd DAU-nun təşkilatçılığı ilə beynəlxalq təhsil kursunun keçirilməsidir.
DAU-nun professorları Ersun İşçioğlu və Dəniz İşçioğlunun məruzələri ilə gerçəkləşən beynəlxalq kursun əsas mövzusu müasir təhsil texnologiyaları və ətraf mühitin inkişafı ilə bağlıdır.
Doğu Akdeniz Universitetinin Azərbaycan üzrə rəsmi təmsilçisi Orxan Həsənoğlu Azərbaycan universitetləri ilə elm-təhsil sahəsində qarşılıqlı əməkdaşlığa daha çox üstünlük verildiyini, hazırda ölkəmizin sürətlə inkişafının və ali təhsil sahəsində beynəlxalq səviyyədə əldə olunan uğurlarının xaricdə fəaliyyət göstərən digər universitetlər kimi DAU-da da maraq mərkəzində olduğunu bildirmişdir.
DAU-nun Azərbaycanın paytaxtında yerləşən universitetlərlə birlikdə ölkəmizin bölgələrində də fəaliyyət göstərən digər universitetlərlə də sıx əməkdaşlıq etdiyini deyən rəsmi təmsilçi bir neçə il öncə DAU-nun rektoru Abdullah Öztoprağın Naxçıvanda olduğunu, eyni zamanda Naxçıvan Dövlət Universiteti və Naxçıvan Özəl Universiteti ilə qarşılıqlı iş birliyinə dair əməkdaşlıq protokolu imzalandığını vurğulamışdır.
Rəsmi təmsilçi Naxçıvana gələn DAU professorlarının Naxçıvanın inkişafından və buradakı universitetlərdə yaradılmış elmi-texniki bazadan razı qaldıqlarını, tələbələrin təhsil alması üçün lazımi şəraitin olduğunu söyləmişdir.
Azərbaycanın digər bölgələri ilə yanaşı, Naxçıvan Muxtar Respublikasından da gənclərin DAU-da təhsil alması, bu il universitetdə təhsil almağa gələn naxçıvanlı tələbələrin sayının çoxluğu diqqətə çatdırılmış, onların təhsil almaqla yanaşı, ölkəmizin həqiqətlərini dünya ictimaiyyətinin nəzərinə daha dolğun şəkildə çatdırmaq məqsədilə gördükləri ictimai işlərlə universitetdə təhsil alan digər ölkələrin tələbələrindən fərqləndiyi xüsusi vurğulanmışdır.
Kursda fəal iştirak edən tələbələrə DAU tərəfindən beynəlxalq sertifikat verilməklə yanaşı, bir tələbə DAU-da ödənişsiz təhsil almaq şansı qazanacaqdır.