SİYASƏT
Azərbaycanın Müstəqillik Günü ərəfəsində Ukraynanın Poltava şəhərində tədbir keçirilib
![](/files/galleryphoto/2024/2/1200x630/1716718292209128494_1200x630.jpg)
![](/files/galleryphoto/2024/2/1200x630/17167182922373734861_1200x630.jpg)
![](/files/galleryphoto/2024/2/1200x630/17167182921507440880_1200x630.jpeg)
![](/files/galleryphoto/2024/2/1200x630/17167182924148135546_1200x630.jpg)
![](/files/galleryphoto/2024/2/1200x630/1716718292543399406_1200x630.jpeg)
Kiyev, 26 may, AZƏRTAC
28 May - Azərbaycanın Müstəqillik Günü ərəfəsində Ukraynanın Poltava Vilayət Filarmoniyasında bayram tədbiri keçirilib. Tədbir Azərbaycan Respublikasının Xarkov şəhərindəki Fəxri Konsulluğu tərəfindən təşkil olunub.
AZƏRTAC xəbər verir ki, tədbirdə çıxış edən fəxri konsul Əfqan Salmanov yaradılan şəraitə görə Poltava Vilayət Hərbi Administrasiyasının rəhbəri Filip Proninə minnətdarlığını bildirib.
Əfqan Salmanov vurğulayıb ki, Azərbaycan Prezidenti İlham Əliyev Azərbaycan xalqının Ümummilli Lideri Heydər Əliyevin müdrik və ardıcıl siyasətini davam etdirərək, ərazi bütövlüyünün qəti və tam bərpasına nail olmağa imkan verən qətiyyətli addımlar atdı.
“Ukrayna hər zaman Azərbaycan Respublikasının ərazi bütövlüyünü və müstəqilliyini tanıyıb. Azərbaycanın da Ukraynaya münasibətdə aydın mövqeyi var. İnanırıq ki, xalqlarımız arasında dostluq həmişə möhkəm olacaq.
Hər kəsi bayram münasibətilə ürəkdən təbrik edirəm! Azərbaycana və Ukraynaya sülh və firavanlıq arzulayıram!” – deyə fəxri konsul bildirib.
Tədbirdə Poltava Regional Administrasiyası rəhbərinin müavini Vladimir Vasilenko, Poltava Vilayət Şurası adından Regional Şura sədrinin birinci müavini Aleksandr Lemeşko, Poltava merinin müavini Vitali Nikipelov da çıxış ediblər.
Çıxışlarda Poltava vilayətinin əməkdaşlıq etdiyi ölkələr arasında lider olan Azərbaycanla iqtisadi və mədəni əlaqələr vurğulanıb. Qeyd olunub ki, Azərbaycan icmasının nümayəndələri vilayətin inkişafında fəal iştirak edirlər.
Diqqətə çatdırılıb ki, Azərbaycan və Ukrayna həmişə suverenlik və müstəqillik uğrunda mübarizə aparıblar. Bu xalqların tarixi faciəli, eyni zamanda, qəhrəmanlıq hadisələri ilə doludur. Bugünkü tədbir bütün azərbaycanlılara təşəkkür etmək üçün yaxşı fürsətdir.