Donald Trampın dəstək reytinqi ABŞ liderləri arasında ən aşağı səviyyəyə enib
Bakı, 28 aprel, AZƏRTAC
Donald Trampın dəstək reytinqi 100 günlük prezidentlik dövründən sonra son 80 ildə ABŞ liderləri arasında ən aşağı səviyyəyə enib.
AZƏRTAC xəbər verir ki, bu barədə məlumat “ABC News” teleradio şirkətinin, “Washington Post” qəzetinin və “Ipsos” sosiologiya xidmətinin keçirdiyi sorğunun nəticələrində öz əksini tapıb.
Tədqiqata görə, respondentlərin yalnız 39 faizi Donald Trampın idarəçiliyini bəyənir, 55 faizi isə onun fəaliyyətindən narazıdır.
Rəyi soruşulan vətəndaşların 73 faizi iqtisadiyyatın pis vəziyyətdə olduğu qənaətindədir. Həmçinin respondentlərin 71 faizi qiymət artımına səbəb kimi prezidentin tətbiq etdiyi idxal rüsumlarını göstərir. Amerikalıların yalnız 31 faizi Donald Trampın uzunmüddətli perspektivdə iqtisadiyyatın daha möhkəm təmələ malik olacağına dair arqumenti ilə razılaşıb.
Eyni zamanda, sorğu iştirakçılarının əksəriyyəti – 58 faizi Donald Tramp administrasiyasının vətəndaşların hüquq və azadlıqlarının müdafiəsi ilə bağlı öhdəliklərinə şübhə ilə yanaşır.
Beynəlxalq münasibətlərə gəlincə, respondentlərin 49 faizinin fikrincə, dövlət başçısı dünyada ABŞ liderliyini gücləndirmək əvəzinə daha da zəiflədib. Buna baxmayaraq amerikalıların 34 faizi Birləşmiş Ştatların hazırkı siyasətini dəstəklədiyini bildirib.
ABŞ vətəndaşlarının 46 faizi Donald Trampın Rusiya ilə həddən artıq xoş davrandığını, 11 faizi onun yanaşmasının sərt olduğunu, 40 faizi isə prezidentin taktikasını bəyəndiyini bildirib.
Qeyd edək ki, sorğu 2025-ci il aprelin 18-22-də təsadüfən seçilən 2464 amerikalı arasında keçirilib.
Bölmənin digər xəbərləri
