Dövlət Proqramı cəbhə bölgəsində yerləşən Tərtər rayonunda uğurla icra olunub FOTOLENT
Tərtər, 19 fevral, Tahir Ağaməmmədov, AZƏRTAC
Regionların 2014-2018-ci illərdə sosial-iqtisadi inkişafı Dövlət Proqramı cəbhə bölgəsində yerləşən Tərtər rayonunda uğurla icra olunub. Proqramın icrası nəticəsində rayonun sosial-iqtisadi göstəriciləri yüksəlib, bir sıra mühüm infrastruktur layihələri yerinə yetirilib, yeni sosialyönümlü obyektlər tikilərək istifadəyə verilib.
Tərtər Rayon İcra Hakimiyyətindən AZƏRTAC-ın bölgə müxbirinə bildiriblər ki, Dövlət Proqramının əhatə etdiyi son beş ildə rayon üzrə məhsul buraxılışının həcmi 62,1 faiz, sənaye məhsulunun həcmi 2,3 dəfə, əsas kapitala yönəldilən investisiyalar 2,8 dəfə, kənd təsərrüfatı məhsullarının həcmi 45,6 faiz artıb. Rayon iqtisadiyyatına və sosial sferanın bütün sahələrinə 299 milyon manat investisiya qoyulub. 167,1 milyon manatlıq əsas fondlar istifadəyə verilib.
2014-2018-ci illərdə rayonda geniş tikinti-quruculuq və abadlıq işləri aparılıb. Bu dövrdə 12 məktəb, 3 körpələr evi-uşaq bağçası, 9 inzibati bina, 1 tibb məntəqəsi tikilib və ya əsaslı təmir edilib. Qarabağ müharibəsi əlilləri və şəhid ailələri üçün 54 mənzilli bina və 14 fərdi yaşayış evi, Uşaq Gənclər Şahmat Məktəbi, Tarix-Diyarşünaslıq Muzeyi, 1176 məcburi köçkün ailəsi üçün çoxmərtəbəli binalar, “Azərxalça” ASC-nin Tərtər filialı inşa olunub. 112 ictimai yaşayış binasının dam örtüyü, fasad və giriş hissələri əsaslı təmir edilib, həyətlərinə asfalt döşənib, 4 küçədə abad məhəllə yaradılıb, 2 mini futbol meydançası quraşdırılıb. Tərtər şəhərinin mərkəzi meydanı və Heydər Əliyev parkı yenidən qurulub, 36 küçədə təmir-abadlıq işləri aparılıb. Təmas xəttində yerləşən 5 kənddə gecə işıqlanması sistemi quraşdırılıb. 2016-cı ilin aprel hadisələri zamanı 17 yaşayış məntəqəsində 256 fərdi yaşayış evinə dəymiş ziyan aradan qaldırılıb.
Dövlət Proqramı çərçivəsində rayonda cins heyvandarlıq, taxılçılıq, pambıqçılıq, baramaçılıq, meyvəçilik, tərəvəzçilik və tingçilik sahələri inkişaf etdirilib. Rayonda əhalinin elektrik enerjisi, təbii qaz, içməli su təminatının, rabitə və informasiya xidmətlərinin yaxşılaşdırılması sahəsində mühüm tədbirlər həyata keçirilib. Rayonun bütün yaşayış məntəqələrinin qazlaşdırılması başa çatdırılıb. Tərtər şəhərinin içməli su və kanalizasiya sistemləri, Tərtər-Seydimli-Qaradağlı-Sarov, Tərtər-Şıxarx, Buruc-Güləbatlı-Xoruzlu-Kəbirli-Bayandurlu-Qaradağlı avtomobil yolları yenidən qurulub, 15 kənd içməli su ilə təchiz olunub, 2 ədəd strateji əhəmiyyətli körpü inşa edilib.
Bölmənin digər xəbərləri
