CƏMİYYƏT
DST 33 ölkədə vərəmin tamamilə aradan qaldırılması üçün strategiya təqdim etmişdir
Bakı, 4 iyul (AZƏRTAC). Dünya Səhiyyə Təşkilatı (DST) vərəmin az yayıldığı ölkələrdə bu xəstəliyin aradan qaldırılması üçün yeni bir strategiya təqdim etmişdir. Hazırda 33 ölkədə bir milyon adamda 100-dək vərəmlə yoluxma faktı qeydə alınmışdır.
Yeni strategiyanın məqsədi 2050-ci ilə kimi vərəmin tamamilə aradan qaldırılmasıdır. Eyni zamanda, strategiyada 2035-ci ilədək ildə ən azı 10 milyon insanda yeni vərəm hallarının sayının azaldılması qarşıya məqsəd qoyulmuşdur.
Həkimlər bildirirlər ki, vərəm müalicə olunan xəstəlikdir. Bununla belə, vərəmlə uğurla mübarizə aparan 33 ölkədə hər il 155 min nəfər bu xəstəliyə yoluxur, 10 min nəfər isə bu xəstəlikdən ölür. Milyonlarla insan isə vərəm virusu ilə yoluxmaq riski ilə üzləşir.
21 Avropa ölkəsi arasında İtaliya, Belçika və Avstriya proqramın tələblərinə cavab verir. 33 ölkədən yerdə qalanlar Amerika, Şərq Aralıq dənizi ölkələri və Sakit okeanın qərbindəki ölkələridir. Siyahıda postsovet ölkələrindən heç biri yoxdur.