CƏMİYYƏT
DSX: 50 kiloqramdan çox narkotik vasitənin ölkə ərazisinə gətirilməsinin qarşısı alınıb
![](/files/galleryphoto/2020/1/1200x630/1580799877172760497_1200x630.jpg)
![](/files/galleryphoto/2020/1/1200x630/15807998775769614184_1200x630.jpg)
![](/files/galleryphoto/2020/1/1200x630/1580799877459114035_1200x630.jpg)
![](/files/galleryphoto/2020/1/1200x630/15807998771098733290_1200x630.jpg)
![](/files/galleryphoto/2020/1/1200x630/15807998775970537212_1200x630.jpg)
![](/files/galleryphoto/2020/1/1200x630/15807998775658022213_1200x630.jpg)
![](/files/galleryphoto/2020/1/1200x630/15807998772708735725_1200x630.jpg)
![](/files/galleryphoto/2020/1/1200x630/1580799877389123983_1200x630.jpg)
Bakı, 4 fevral, AZƏRTAC
Son dövrdə Azərbaycan-İran dövlət sərhədində külli miqdarda narkotik vasitənin ölkə ərazisinə gətirilməsinin qarşısı alınıb, təqsirkar şəxslər müəyyənləşdirilərək cinayət məsuliyyətinə cəlb olunub.
Dövlət Sərhəd Xidmətinin mətbuat mərkəzindən AZƏRTAC-a bildiriblər ki, bu nəticələr dövlət sərhədinin fiziki və texniki yolla mühafizəsinin təkmilləşdirilməsi, bilavasitə dövlət sərhəd xəttində müasir müşahidə və aşkaretmə avadanlıqlarının tətbiqi, əməliyyat-axtarış fəaliyyətinin genişləndirilməsi, İran İslam Respublikasının sərhəd qoşunları ilə qarşılıqlı faydalı əməkdaşlığın daha da inkişaf etdirilməsi sayəsində əldə olunub.
Dövlət sərhədinin etibarlı mühafizəsi istiqamətində həyata keçirilmiş əməliyyat-axtarış və qoşun tədbirləri nəticəsində cari il yanvarın 1-dən etibarən 5 halda ümumi çəkisi 50 kiloqram 230 qram və 8500 ədəd həb şəklində narkotik vasitənin və psixotrop maddələrin qaçaqmal yolu ilə ölkə ərazisinə gətirilməsinin qarşısı alınıb. Eləcə də dörd nəfər Azərbaycan və 2 nəfər İran vətəndaşı saxlanılaraq cinayət məsuliyyətinə cəlb olunub.
Təkcə son on gün ərzində Azərbaycan-İran dövlət sərhədində üç halda ölkə ərazisinə narkotik vasitələrin gətirilməsinin qarşısı alınıb. Yanvarın 26-da “Horadiz” sərhəd dəstəsinin xidməti ərazisində İmişli rayonunun Bəhrəmtəpə qəsəbəsi yaxınlığındakı sərhəd zastavasının xidməti sahəsində İran İslam Respublikasından Azərbaycan Respublikasına doğru hərəkət edən bir nəfər naməlum şəxs tərəfindən dövlət sərhədinin pozulmasının qarşısı alınıb, qaçaqmalçı əlindəkiləri ataraq geri qaçıb. Həmin ərazi dərhal qapadılaraq axtarış tədbirləri keçirilib. Nəticədə kisənin içərisində 1,9 kiloqram narkotik vasitə aşkarlanaraq götürülüb.
Fevralın 1-də “Horadiz” sərhəd dəstəsinin xidməti ərazisində İmişli rayonunun Aranlı kəndi yaxınlığındakı sərhəd zastavasının xidməti sahəsində İran İslam Respublikasından Azərbaycana doğru hərəkət edən 2 nəfər naməlum şəxs sərhəd naryadı tərəfindən müşahidə edilib. Sərhəd naryadının “Dayan!” əmrinə tabe olmayan sərhəd pozucularına qarşı silahdan havaya xəbərdarlıq məqsədilə atəş açılıb və sərhəd pozucuları əllərindəki çanta ilə qaçmaq istəyərkən saxlanılıblar. Saxlanılan şəxslərin İran vətəndaşları 1980-ci il təvəllüdlü Rza Zend Xanhüseyn və 1986-cı il təvəllüdlü Muradi Talıb Bayram olması müəyyənləşdirilib. Sərhəd pozucularının üzərinə baxış zamanı ümumi çəkisi 9 kiloqram 485 qram olan narkotik vasitə və 823 ədəd həb, həmçinin SUR-2608 markalı tapança, 1 daraq, 6 patron aşkarlanaraq götürülüb.
Fevralın 2-də “Göytəpə” sərhəd dəstəsinin xidməti ərazisində Cəlilabad rayonunun Məlikqasımlı kəndi yaxınlığındakı sərhəd zastavasının xidməti sahəsində İrandan Azərbaycana doğru hərəkət edən iki nəfər naməlum şəxs tərəfindən dövlət sərhədinin pozulmasının qarşısı alınıb. Sərhəd pozucuları əllərindəki çantanı əraziyə ataraq geri qaçıblar. Ərazidə axtarış tədbirləri keçirilib, 2 çantanın içərisində 16 kiloqram 200 qram narkotik vasitə və 5377 həb aşkarlanaraq götürülüb.
Sərhədin pozulması hallarının hər biri barədə sərhəd nümayəndəliyi xətti ilə İran sərhədçiləri müvafiq qaydada məlumatlandırılıb, bu kimi hallara qarşı birgə mübarizə tədbirlərinin gücləndirilməsi razılaşdırılıb. Faktlar üzrə əməliyyat-istintaq tədbirləri davam etdirilir.