DÜNYA ƏHALİ GÜNÜ QEYD EDİLMİŞDİR
Açılış mərasimində BMT-nin Azərbaycanda rezident-əlaqələndiricisi Marko Borsotti Dünya Əhali Gününün builki mövzusunun gənclərə həsr edildiyini bildirmiş, bu münasibətlə təşkil olunan fotosərginin əhəmiyyətindən danışmışdır. O, dünya əhalisinin təqribən yarısını 25 yaşadək insanların təşkil etdiyini bildirmiş, gələcək nəsillərin firavan yaşamasının gənclərin inkişafından asılı olacağını söyləmiş, onların ehtiyaclarının lazımi səviyyədə ödənilməsinin vacibliyini vurğulamışdır.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Azərbaycanda gənclərin rifahının yaxşılaşdırılması üçün bir sıra Dövlət proqramlarının həyata keçirildiyini bildirmişdir. Sədr məlumat vermişdir ki, komitə BMT-nin Əhali Fondu (UNFPA) və Qadınlar üçün İnkişaf Fondu (YUNİFEM) ilə birgə gender bərabərliyi və ailə məsələləri üzrə Milli Fəaliyyət Planını, BMT-nin Uşaq Fondu (YUNİSEF) ilə birgə Uşaq problemləri üzrə Milli Fəaliyyət Planını hazırlayır.
Sonda fotosərginin qalibləri mükafatlandırılmışdır.
Tədbir incəsənət ustalarının konsert proqramı ilə davam etdirilmişdir.
