Dünya Səhiyyə Təşkilatı uşaqların vərəmdən ölüm hallarının qarşısını alan yeni plan təqdim etmişdir
Bakı, 2 oktyabr (AZƏRTAC). Hər gün yaşı 15-dək olan 200-dən çox uşaq vərəmdən dünyasını dəyişir, halbuki bu xəstəliyin qarşısını almaq və onu müalicə etmək mümkündür. Dünya Səhiyyə Təşkilatının (DST) bu barədə yaydığı məlumatda deyilir ki, DST ekspertləri və tərəfdaşlarının fikrincə, xüsusi fəaliyyət planının köməyi ilə hər il 74 min uşağı vərəm xəstəliyinin səbəb olduğu ölüm hallarından qurtarmaq olar.
Uşaqların vərəmdən ölüm hallarının kökünü kəsmək üçün DST-nin himayəsi ilə Vaşinqtonda “yol xəritəsi” işə salınmışdır. Onun müəlliflərinin qənaətinə görə, 120 milyon ABŞ dolları hər il minlərlə uşağı vərəmə yoluxmaqdan xilas etməyə, artıq yoluxmuş, o cümlədən vərəmə və İÇV-yə yoluxmuş on minlərlə uşağı müalicə etməyə imkan verəcəkdir.
Dünyada hər 10 vərəmə yoluxma halının biri, yəni bütün vərəm xəstəliklərinin 6-10 faizi yaşı 15-dək olan uşaqların payına düşür. Lakin bu göstərici yüksək də ola bilər. Axı, uşaqların çoxunun diaqnostikaya müraciət etmək imkanı yoxdur.
Təqdim edilmiş yeni fəaliyyət planı xəstəlik haqqında ən müasir biliklərə söykənir və uşaqların vərəmdən ölüm hallarının aradan qaldırılmasına dair konkret tədbirləri müəyyən edir.
Bölmənin digər xəbərləri
