Əbu-Dabidə Dünya Təbiəti Mühafizə Konqresi işinə başlayıb
Qahirə, 9 oktyabr, AZƏRTAC
Oktyabrın 9-da Əbu-Dabidə Dünya Təbiəti Mühafizə Konqresi işinə başlayıb.
AZƏRTAC yerli mediaya istinadla xəbər verir ki, Beynəlxalq Təbiəti Mühafizə Birliyi (IUCN) tərəfindən təşkil olunan tədbir oktyabrın 15-dək davam edəcək. Konqresdə 160 ölkədən mütəxəssislərin, əlaqədar qurumların rəhbərlərinin, ümumilikdə 10 mindən çox qonağın iştirakı gözlənilir.
Konqres çərçivəsində forum, sərgi və təşkilat üzvlərinin assambleyası keçiriləcək. Forum təbiətin mühafizəsi və davamlı inkişaf sahəsində elm, təcrübə və innovasiyalar üzrə ən böyük bilik platformasıdır. Tematik sessiyalar vasitəsilə forum vəhşi təbiətdən okeanlara, qoruqlardan davamlı biznesə, iqlim dəyişikliyindən insan hüquqlarına qədər geniş spektrdə təbiətin mühafizəsi məsələlərinin iqtisadi, sosial, elmi və texniki tərəflərini əhatə edir.
Sərgidə IUCN üzvləri və komissiyaları, biznes qurumları, tərəfdaşlar və akademik dairələr pavilyonlar, stendlər və tədbirlər təşkil edirlər. Sərgi həm konqres iştirakçıları, həm də ictimaiyyət üçün açıqdır və iştirakçılara öz tədqiqatlarını, innovasiyalarını və fəaliyyətlərini ən geniş auditoriyaya təqdim etməyə imkan verir.
Assambleya IUCN-in ən yüksək qərarverici orqanıdır. Toplantıda IUCN-in üzv təşkilatları təbiətin mühafizəsi və davamlı inkişafla bağlı təxirəsalınmaz məsələlər üzrə səs verəcəklər.
Konqres çərçivəsində "Nəsli kəsilmə təhlükəsində olan növlərin Qırmızı Siyahısı"nın yenilənmiş versiyası təqdim olunacaq. 1964-cü ildən bəri IUCN minlərlə canlı növünü yoxaçıxma təhlükəsi səviyyəsinə görə təsnif edir. Ötən ilin məlumatlarına görə, siyahıya salınmış 169 min növdən 47 mindən çoxu nəsli kəsilməkdə olan növlər kimi təsnif edilib. Bu isə qlobal biomüxtəlifliyə olan təzyiqlərin artdığını göstərir.
IUCN-in baş direktoru Qretel Aqilar bildirib ki, konqres dünyada hökumətləri, vətəndaş cəmiyyəti institutlarını və ekspertləri “Təbiəti qiymətləndirən və qoruyan ədalətli dünya” hədəfi ətrafında birləşdirən bir tədbirdir. Əlavə edib ki, konqres dünyada təbiətin mühafizəsi üçün qarşıya qoyulmuş ortaq hədəf uğrunda fəaliyyət göstərmək üçün yaxşı fürsətdir.
Qeyd edək ki, Beynəlxalq Təbiəti Mühafizə Birliyi 1948-ci ildə yaradılıb. Mərkəzi iqamətgahı İsveçrənin Qland şəhərində yerləşir. İlk beynəlxalq ekologiya təşkilatı sayılır. Ətraf mühitlə əlaqəli 1400-dən çox hökumət və qeyri-hökumət təşkilatını, eləcə də dünya ölkələrindən 17 mindən çox eksperti özündə birləşdirir. Təşkilatın 2021-ci il sentyabrın 3-dən 11-dək Fransanın Marsel şəhərində onlayn formatda keçirilən konqresində dünyanın müxtəlif yerlərindən 9 min 200-dən çox insan canlı və virtual olaraq iştirak edib və ümumilikdə 25 min nəfərlik ümumi ziyarətçi sayı qeydə alınıb. Konqres 140 ölkədə 10 mindən çox xəbərdə işıqlandırılıb və sosial mediada gündəlik olaraq 54 milyon insana çatıb. Konqresin sessiyaları 50 mindən çox baxış toplayıb.
Qahirə
Bölmənin digər xəbərləri
