Ədalətli sülhün qüdrətli lideri - Prezident İlham Əliyev
Bakı, 24 yanvar, AZƏRTAC
Azərbaycan dünyada sülh, təhlükəsizlik, ədalətli siyasət və hərtərəfli inkişaf ölkəsi kimi böyük nüfuz qazanıb. Beynəlxalq ictimaiyyət Azərbaycan Prezidenti İlham Əliyevi ədalətli sülh uğrunda mübarizə aparan, ölkəsinin bütün istiqamətlər üzrə yüksək inkişafına nail olan, xalqını tarixi Zəfərə çatdıran, müstəqil dövlətin ərazi bütövlüyünü təmin edən dünya liderlərindən biri kimi qəbul edir. Prezident İlham Əliyevin Azərbaycan-Ermənistan münaqişəsini sülh yolu ilə həll etmək üçün illər uzunu apardığı məqsədyönlü, ədalətli siyasət və tarixi Qarabağ Zəfərindən sonra qonşu ölkə ilə Sülh sazişi bağlamaq sahəsində göstərdiyi təşəbbüslər, atdığı addımlar ədalət və sülh uğrunda mübarizənin reallıqlarını aydın surətdə nümayiş etdirir.
AZƏRTAC xəbər verir ki, bu fikirləri Azərbaycan Milli Elmlər Akademiyasının prezidenti, akademik İsa Həbibbəyli bildirib.
Akademik qeyd edib ki, xüsusən, 2025-ci il avqustun 8-də Amerika Birləşmiş Ştatlarının paytaxtı Vaşinqtonda – Ağ Evdə ABŞ Prezidenti Donald Trampın iştirakı ilə Azərbaycanla Ermənistan arasında Sülh müqaviləsinin paraflanması Prezident İlham Əliyevin dünyada və regionda Sülh və təhlükəsizlik uğrunda qazandığı böyük tarixi uğur kimi qiymətləndirilməyə layiqdir. Bu, dövlətimizin başçısının Cənubi Qafqazda və dünyada ədalətli sülhün bərqərar olmasına böyük töhfəsidir.
“Dünya liderlərinin və tanınmış dövlət xadimlərinin iştirak etdiyi Davosda Prezident İlham Əliyevin keçirdiyi görüşlərin, apardığı müzakirələrin ana xətləri də dünyada sülh, təhlükəsizlik, ədalət, əməkdaşlıq, humanizm və inkişaf prinsiplərindən ibarətdir. Amerika Birləşmiş Ştatlarının Prezidenti Donald Trampın dəvəti ilə Azərbaycan Prezidenti İlham Əliyevin “Sülh Şurasının Nizamnaməsi” sənədinin imzalanması və Sülh Şurasının üzvü kimi qəbul edilməsi müstəqil Azərbaycan dövlətinin rəhbərinin beynəlxalq nüfuzunun, dünyada ədalətli sülh uğrunda mübarizə aparan görkəmli dövlət xadimi olmasının parlaq və əyani göstəricisidir. Dövlətimizin başçısının sülh, ədalət və təhlükəsizlik sahəsindəki böyük təcrübəsi planetimizdə münaqişələrin yatırılması, müharibələrə son qoyulması, sülhün və sabitliyin yaradılması üçün ən mükəmməl direktivlər hesab oluna bilər. Sülh və təhlükəsizlik məsələlərində ədalətli modelin yaradıcısı olan İlham Əliyevin “Sülh Şurasının Nizamnaməsi” sənədinin imzalanma mərasimində yüksək səviyyədə təmsil olunması dünyada və xüsusən də Yaxın Şərqdə ədalətli sülhün əldə olunacağına real təminatdır. Azərbaycan Prezidenti, Müzəffər Ali Baş Komandan İlham Əliyevin “dəmir yumruğ”u ədalətli sülhün, davamlı və dayanıqlı təhlükəsizliyin simvoludur”, - deyə o əlavə edib.
İ.Həbibbəyli diqqətə çatdırıb ki, Azərbaycan xalqı üçün, xüsusən ziyalı cəmiyyət üçün xalqımızın liderinin Sülh Şurasında yer alması böyük qürurdur. Ulu Öndər Heydər Əliyevin Siyasi Büroda, Prezident İlham Əliyevin dünyanın ən üst qurumlarında qazandığı xüsusi mövqe və böyük imic Azərbaycan xalqının milli iftixar duyğusunun əvəzsiz nümunəsi olduğu kimi, bu gün də Sülh Şurasında müstəqil Azərbaycan dövlətinin yer alması dünya siyasətində Azərbaycan liderinin qazandığı siyasi-diplomatik uğurun təntənəsidir. Sülh Şurasında Prezident İlham Əliyevin üzvlüyü təkcə Yaxın Şərqdə yox, ümumiyyətlə dünyada ədalətli sülhə, davamlı və dayanıqlı təhlükəsizliyə doğru mühüm addımdır. Bu, Azərbaycanın müstəqillik illərində gəlib çatdığı ən yüksək siyasi və diplomatik zirvədir. Bu, dünya siyasətinə Qafqazın simvoluna çevrilmiş və Türk dünyasında aparıcı mövqeyə malik olan qüdrətli bir liderin möhtəşəm töhfəsidir. Harada Prezident İlham Əliyev varsa, orada ədalət və sülh qalib gələcək, böyük quruculuq və hərtərəfli inkişaf hadisəsi baş verəcəkdir.
“Müstəqil dövlətimizə qazandırdığı yeni tarixi Zəfərə görə xalqımızın qüdrətli liderinə dünyada ədalətli sülh uğrunda mübarizədə, ölkəmizin hərtərəfli inkişafı yollarında daha böyük uğurlar arzulayıram. Xalqımızı və elmi ictimaiyyəti ürəkdən təbrik edirəm”, - deyə o vurğulayıb.
Bölmənin digər xəbərləri
