EKOLOJİ İDARƏETMƏ SİSTEMİNƏ DAİR SEMİNAR KEÇİRİLMİŞDİR
AZƏRTAC xəbər verir ki, bu günlərdə Bakıda, “Park İNN-Azərbaycan” mehmanxanasında Azərbaycan Respublikası Dövlət Neft Şirkəti (ARDNŞ) Norvecin “StatoilHydro” şirkəti ilə birlikdə ARDNŞ-in Ekoloji İdarəetmə Sisteminə dair seminar keçirmişdir.
“StatoilHydro” şirkətinin aparıcı mütəxəssisləri ətraf mühitin mühafizəsi sahəsində qəbul etdikləri prinsiplər, onlara nail olmaq üçün yaradılmış idarəetmə strukturu və dövlət orqanları ilə qarşılıqlı münasibətlər barədə ətraflı çıxış etmiş, azərbaycanlı həmkarları ilə təcrübə mübadiləsi aparmışlar.
Birgə seminarda həmçinin, neft-qaz əməliyyatları prosesində formalaşan tullantıların, xüsusən ətraf mühitə daha çox təsir edən lay sularının və qazma şlamının dərindən təmizlənməsi üçün yeni texniki vasitələr barədə məlumat verilmişdir. Mütəxəssislər hesab edirlər ki, seminar ARDNŞ tərəfindən bu yaxınlarda qəbul edilmiş Dövlət Neft Şirkətinin ekoloji siyasətinin “Sıfır tullantı” prinsipinə əməl olunmasında müsbət rol oynayacaqdır.
Bölmənin digər xəbərləri
