Eksperimental teatr festivalı çərçivəsində “dəyirmi masa” keçirilmişdir
Bakı, 30 oktyabr (AZƏRTAC). Xəbər verdiyimiz kimi, Bakıda Azərbaycan Teatr Xadimləri İttifaqının (ATXİ) təşəbbüsü, Mədəniyyət və Turizm Nazirliyinin dəstəyi ilə “2+1” ikinci Eksperimental teatr festivalı keçirilir.
AZƏRTAC xəbər verir ki, festival çərçivəsində oktyabrın 30-da Azərbaycan Teatr Xadimləri İttifaqında teatrşünasların iştirakı ilə “dəyirmi masa” təşkil edilmişdir.
“Dəyirmi masa”da ATXİ-nin sədri, Xalq Artisti Azərpaşa Nemətov, teatrşünas Vidadi Qafarov, Bakı Uşaq Teatrının direktoru və baş rejissoru İntiqam Soltan, festivalda nümayiş etdirilmiş tamaşaların rejissorları - Könül Şahbazova, Hacıbaba Məmmədov və başqaları çıxış edərək müzakirə olunan mövzu ilə bağlı fikirlərini bölüşmüşlər.
Tədbirdə festivalın ikinci günündə nümayiş etdirilmiş
F.Kafkanın “Varyete” tamaşası müzakirə edilmişdir. Natiqlər tamaşadakı çatışmazlıqları söyləməklə yanaşı, səhnə əsərinin təlqin etdiyi mütərəqqi xüsusiyyətləri, gənclərin həyata baxışlarının formalaşmasına, onların zövqlərinin, bədii-estetik dünya görüşlərinin inkişafına müsbət təsir göstərəcəyini də söyləmişlər.
Sonda Azərpaşa Nemətov gənclərə istər səhnə qoyuluşu, istər də aktyor oyunu baxımından daha çox yeni ampluada, novator və avanqard üslubda əsərlərin səhnəyə gətirilməsini tövsiyə etmişdir.
Festival noyabrın 2-dək davam edəcəkdir.
Bölmənin digər xəbərləri
