Ekspert: Orta Dəhlizin inkişafı Azərbaycanın istehsal potensialını da artırır - ŞƏRH
Bakı, 18 sentyabr, AZƏRTAC
Orta Dəhlizə beynəlxalq marağın artması və marşrut üzrə yükdaşımaların həcminin yüksəlməsi Azərbaycanın nəqliyyat və logistika imkanlarının genişləndirilməsi baxımından yeni perspektivlər yaradır. Bu prosesdə əsas diqqət yalnız tranzit yükdaşımaların artırılmasına deyil, həm də dəhliz boyunca logistika və istehsal imkanlarının inkişaf etdirilməsinə yönəldilməlidir.
Bu fikirləri AZƏRTAC-a açıqlamasında nəqliyyat üzrə ekspert Rauf Ağamirzəyev deyib.
Ekspert bildirib ki, Orta Dəhliz üzrə yük axınlarının strukturunda müxtəlif yük növlərinin payı artır. Səpinti yükləri, neft məhsulları, gübrə və digər yüklərlə yanaşı, xüsusilə konteyner daşımalarının genişlənməsi marşrutun beynəlxalq təchizat zəncirlərində rolunun artdığını göstərir.
R.Ağamirzəyevin sözlərinə görə, Azərbaycanın qarşısında duran əsas məsələlərdən biri də dəhlizin imkanlarından yalnız tranzit məqsədilə deyil, ölkə daxilində əlavə iqtisadi dəyərin yaradılması üçün istifadə etməkdir.
“Orta Dəhliz boyunca logistika mərkəzlərinin, sənaye müəssisələrinin və istehsal sahələrinin formalaşması xüsusi əhəmiyyət daşıyır. Belə yanaşma yükün sadəcə Azərbaycan ərazisindən keçməsini deyil, burada emal olunmasını, əlavə dəyər yaradılmasını və yeni iqtisadi fəaliyyət sahələrinin meydana çıxmasını təmin edə bilər”, – deyə ekspert qeyd edib.
O vurğulayıb ki, Azərbaycanda sənaye və texnologiyalar parklarının, azad iqtisadi zonaların yaradılması bu baxımdan mühüm imkanlar formalaşdırır. Zəyəm Texnologiyalar Parkında dəmir yolu sektoru üçün müxtəlif ehtiyat hissələrinin istehsalının həyata keçirilməsi də yerli istehsalın nəqliyyat infrastrukturu ilə əlaqələndirilməsinə nümunədir.
Ekspertin fikrincə, Ağdam və digər ərazilərdə yaradılan yeni istehsal müəssisələri də gələcəkdə Orta Dəhliz üzrə yük bazasının genişlənməsinə töhfə verə bilər.
“İstehsal müəssisələrinin nəqliyyat dəhlizlərinə yaxın ərazilərdə yerləşdirilməsi logistika xərclərinin optimallaşdırılması baxımından da əhəmiyyətlidir. Eyni zamanda, bu müəssisələr yeni yük axınlarının yaranmasına səbəb olur. Beləliklə, dəmir yolu və digər nəqliyyat infrastrukturu yalnız tranzit üçün deyil, ölkə daxilində istehsal və iqtisadi fəallığın inkişafı üçün də istifadə edilir”, – deyə R.Ağamirzəyev bildirib.
Nəqliyyat üzrə ekspert qeyd edib ki, Azərbaycanın coğrafi mövqeyi Orta Dəhlizin inkişafı baxımından mühüm üstünlüklərdən biridir. Ölkənin Avropa ilə Asiyanı birləşdirən marşrutların üzərində yerləşməsi yükdaşımaların vaxt və məsafə baxımından səmərəliliyinin artırılmasına imkan yaradır.
Onun sözlərinə görə, nəqliyyat müddətinin qısaldılması və logistika xərclərinin aşağı salınması Azərbaycanın həm tranzit, həm də istehsal mərkəzi kimi rəqabət qabiliyyətini gücləndirə bilər.
R.Ağamirzəyev əlavə edib ki, qarşıdakı dövrdə Orta Dəhlizin inkişafına kompleks yanaşılmalı, dəmir yolu və avtomobil yolları ilə yanaşı, limanlar, logistika terminalları, sənaye parkları və istehsal müəssisələri vahid iqtisadi zəncir çərçivəsində inkişaf etdirilməlidir. Bu, Azərbaycanın regional nəqliyyat və logistika sistemində rolunun daha da möhkəmlənməsinə və dəhlizdən əldə olunan iqtisadi səmərənin artırılmasına şərait yaradacaq.
Bölmənin digər xəbərləri
