Ermənilərin Xocalıda törətdikləri soyqırımı cinayəti cəzasız qalmayacaqdır
Salyan, 26 fevral (AZƏRTAC, Mahir Babayev). Salyanda Xocalı soyqırımının 22-ci ildönümünə həsr olunmuş tədbir keçirilmişdir.
AZƏRTAC xəbər verir ki, əvvəlcə rayon rəhbərliyi, ictimaiyyət nümayəndələri Xocalı soyqırımı qurbanlarının xatirəsini yad etmək üçün Azərbaycanın ərazi bütövlüyü uğrunda döyüşlərdə şəhid olmuş Vətən oğullarının xatirəsinə ucaldılmış abidə kompleksi önünə gül dəstələri qoymuşlar.
Ümumrayon tədbirində çıxış edənlər 200 ildən artıq bir müddətdə Ermənistanın Azərbaycana qarşı törətdiyi terror və işğalçılıq siyasəti barədə məlumat vermiş, Xocalı soyqırımının da bu siyasətin davamı olduğunu bildirmişlər. Erməni vəhşiliyinin əsl hüquqi-siyasi qiymət almasında ümummilli liderin qətiyyətindən danışan natiqlər bu gün həmin həqiqətlərin dünyada tanıdılması üçün Heydər Əliyev Fondunun əvəzsiz xidmətlərini diqqətə çatdırmışlar.
Sonra rayonun özfəaliyyət kollektivləri tərəfindən “Eşit, harayımı, dünya!” adlı ədəbi-bədii kompozisiya təqdim edilmişdir. Yerli aktyorlar erməni vəhşiliyini real boyalarla təqdim etmişlər. Kompozisiyada belə bir fikir xüsusi yer tutmuşdur ki, ermənilərin Xocalı cinayəti cəzasız qalmayacaq və bəşəriyyət bu soyqırımını öz adı ilə çağıracaqdır.
Bölmənin digər xəbərləri
