Bu il Ordumuzun qarşısına qoyulan əsas tapşırıqlardan biri Qarabağda qanunsuz erməni quldur dəstələrinin silahsızlaşdırılmasıdır

Bakı, 18 yanvar, AZƏRTAC

Prezidentin yerli televiziya kanallarının jurnalistlərinə verdiyi müsahibə həm də 2023-cü il üçün siyasi və hərbi yol xəritəsi idi. Bu, əslində Azərbaycanın hərbi strukturlarına 2023-cü ildə mövcud ola biləcək təhdid və təhlükələrin aradan qaldırılması istiqamətində hərbi direktiv və ya təlimat da hesab oluna bilər. Həmin müsahibə zamanı xüsusilə iki istiqamətdə göstəriş verildiyini deyə bilərik. Birincisi, dövlətimizin əsas təhlükəsizlik konsepsiyası Ermənistan tərəfindən mövcud ola biləcək təhdid və təhlükələrə qarşı hazırlanıb. Ötən il İranın da Ermənistana verdiyi dəstək çərçivəsində bunun miqyası daha da genişlənib. Bununla da Silahlı Qüvvələrimizin bu il qarşısında qoyulacaq tapşırıqların sayı da artıb. Prezidentimizin müsahibəsində Ermənistana göndərilən mesaj ondan ibarətdir ki, həmin ölkə Azərbaycanla revanşist bəyanat və ritorika ilə danışmaqdan uzaqlaşmalı və imzalanmış üçtərəfli Bəyanatın icrasına köklənməlidir, üzərinə götürdüyü öhdəlikləri yerinə yetirməlidir. Çünki Ermənistanın təxribatçı bəyanatlarla çıxış etməsi üçün ciddi hərbi potensialı yoxdur. Xüsusən də 44 günlük Vətən müharibəsindən sonra ordumuz Ermənistanın hərbi imkanlarının 60-70 faizini məhv etdi. Yəni, düşmən öz zirehli nəqliyyat vasitələrinin əksəriyyətini döyüş meydanında qoyub qaçdı, digər hissəsi yararsız hala düşdü. Belə bir vəziyyətdə revanşist bəyanatlar səsləndirmək və təxribatyönümlü addımlar atmaq gülünc və absurddur.

AZƏRTAC xəbər verir ki, bunu ehtiyatda olan polkovnik-leytenant, hərbi ekspert Elxan Şıxəliyev Prezident İlham Əliyevin yerli televiziya kanallarına müsahibəsində səsləndirdiyi fikirləri şərh edərkən deyib.

Bildirib ki, Ermənistanın Azərbaycanla sərhəddə hər hansı ciddi təhlükə yarada biləcək gücü yoxdur. Sadəcə olaraq onlar atəşkəsin pozulmasını lokal dislokasiya mövqelərindən həyata keçirə bilərlər. Ermənistan müxtəlif səbəblər uyduraraq, Avropaya atəşkəsin pozulmasını imitasiya edə bilər ki, guya onlar təhlükə altındadırlar və blokadaya düşüblər. Sonra da həmin proseslər Avropa institutlarının hesabatları üçün şərti sərhəddə atəşkəsin pozulması kimi ssenariləşdiriləcək: “Eyni zamanda, Azərbaycan avropalı tərəfdaşlarına hər hansı bir təhlükə ilə üzləşəcəyimiz təqdirdə, dərhal hərəkətə keçəcəyimiz barədə əvvəlcədən bildirib. Beynəlxalq aparıcı qüvvələrin bu hadisələrə reaksiyası adekvat olub. Yəni, ölkəmizin əməliyyat keçirməsinə və ya keçirəcəyinə görə heç kim bizi qınamayıb, heç kim bizi günahlandırmayıb. Çünki hər kəs görüb ki, toqquşmaların səbəbkarı Azərbaycan yox, Ermənistandır. Əslində Silahlı Qüvvələrimiz, xüsusən birinci eşalon bölmələrinin birlik və birləşmə komandirləri atəşkəs pozulacağı halda cavab tədbirləri görməyə hazırdırlar”.

E.Şıxəliyevin sözlərinə görə, 2023-cü ildə əsas narahatçılığımız Qarabağ ərazisində yuva salmış separatçı qurumun tabeçiliyindəki qeyri-qanuni erməni hərbi birləşmələr olacaq. Əgər Azərbaycan ərazilərində qeyri-qanuni silahlı hərbi qruplaşmalar varsa, bu, bizim üçün real təhdid və təhlükədir. İkinci Qarabağ müharibəsinə son qoyan üçtərəfli Bəyanatın 4-cü bəndində göstərilir ki, Ermənistan tərəfi Rusiya sülhməramlı kontingentinin yerləşdirildiyi ərazilərimizdən özünün bütün silahlı dəstələrini çıxarmalıdır. Lakin Bəyanatın həmin bəndi hələ də icra olunmayıb və erməni hərbi birləşmələri orada qalıb. Onlar bizim üçün terrorçu qruplaşma hesab olunur. Bizim ərazilərimizdə qanunsuz qruplaşmaların mövcudluğu isə qırmızı xəttimizdir. Odur ki, 2023-cü ildə Silahlı Qüvvələrin qarşısına qoyulan əsas tapşırıqlar həmin erməni quldur dəstələrinin silahsızlaşdırılmasıdır. Xüsusən də Müdafiə Nazirliyində keçirilən sonuncu xidməti müşavirədə nazir, general-polkovnik Zakir Həsənov Ali Baş Komandanın Azərbaycan Ordusu qarşısında qoyduğu tapşırıqları Qarabağın perimetrində olan birlik və birləşmə komandirlərinin, bütün qoşun növləri komandanlarının, baş idarə, idarə və xidmət rəislərinin diqqətinə çatdırıb. Bu il Qarabağın Azərbaycanın yurisdiksiyasına keçməsi ilə Ermənistanın artıq ölkəmizlə sülh sazişi imzalaması və qeyri-qanuni birləşmələrin ərazilərimizdən çıxarılması labüddür. Dövlətimizin başçısının dediyi kimi, sərhəddə vizual müşahidə Azərbaycan tərəfinə imkan verir ki, istənilən təhlükəni bəri başdan görsün və onun qarşısını alsın. İnanırıq ki, əməliyyatlar zamanı üç dəfə belə hərbi və siyasi uğursuzluğa düçar olmuş Ermənistan sülh müqaviləsini imzalamasının qaçılmaz olduğunu anlayacaq. Onlar bunu nə qədər tez anlasalar, o qədər də bölgədə sülhün bərqərar olması tezləşəcək.

“Biz separatçı rejimin nəzarətindəki qeyri-qanuni birləşmələrə və gələcəkdə ərazilərimizdə yaşamaq istəyən ermənilərə sonuncu dəfə təklif irəli sürürük ki, əllərindəki silahları yerə qoysunlar. Əgər onlar bunu etməsələr, Azərbaycan onları tamamilə silahsızlaşdıracaq, yəni antiterror əməliyyatların keçirilməsi artıq zərurətə çevriləcək. Hər bir halda Silahlı Qüvvələrimizin 2023-cü il hərbi yol xəritəsinə görə, qeyri-qanuni birləşmələrin ərazimizdən hərbi əməliyyatla çıxarılması variantına da hazır olmalıyıq. İndiki mərhələdə həmin ərazilərdəki birinci eşalon hərbi birliklərimizin, komando briqadalarımızın əməliyyatlar zolağındakı tapşırıqlarına baxsaq, o zaman erməni quldur dəstələrinin bizə ciddi müqavimət göstərə biləcək gücdə olmadıqlarını anlayarıq”, - deyə hərbi şərhçi əlavə edib.

Hərbi ekspertin sözlərinə görə, antiterror əməliyyatının aparılmasının zəruriliyi qarşı tərəfin bundan sonrakı davranışından asılı olacaq. “Fərrux”, “Qisas” əməliyyatları və sərhəd istiqamətində silahlı insidentlər zamanı ermənilər Azərbaycan Silahlı Qüvvələrini təhrik etdilər. E.Şıxəliyevin proqnozlarına əsasən, erməni silahlı dəstələri eyni yolla hərbçilərimizi yenə əməliyyat aparmağa təhrik etmək üçün atəşkəsi poza bilər və Rusiya sülhməramlı qüvvələrinin arxasında gizlənə bilərlər. Bu isə ermənilərin məkrli hiyləgərlik planlarının bir hissəsi ola bilər. Separatçı rejimin siyasi və hərbi rəhbərliyinin hansı yolu seçməsindən asılı olmayaraq, qeyri-qanuni birləşmələrin həmin ərazilərdən çıxarılması istiqamətində 2023-cü il onlar üçün sonuncu imkan olacaq. Ümumiyyətlə, insidentlərin səbəbi olan amillərin bu il aradan qaldırılmasını gözləyə bilərik.

Polkovnik-leytenant bildirib ki, Laçın nəzarətimizdə olduğu üçün erməni hərbçilərdə təslimçilik ritorikası ab-havası hökm sürəcək: “Əgər Ermənistandan Azərbaycanın strateji məqsədlərini sülh yolu ilə həyata keçirmək yönündə müsbət mesajlar gəlməyə başlasa, onda sərt güc tətbiq etməyə ehtiyac qalmayacaq. Ümumiyyətlə, Azərbaycan tərəfinin mövqeyinin sözdən ibarət olmadığını düşmən 44 günlük müharibənin nəticələrindən bilir. Biz fikrimizdə qətiyyətliyik və dövlətimizin başçısının mövqeyi də məlumdur. Bütün Qarabağ ərazisinin Silahlı Qüvvələrimizin tam nəzarəti altına keçməsi yönündə ermənilərə verilmiş son müddət 2023-cü ildə yekunlaşacaq. Ona görə Ermənistan da bunu anlamalı və üçtərəfli Bəyanatın icrasına yönələn nəzərəçarpacaq addımlar atmalıdır”.