MƏDƏNİYYƏT
“Fantaziyamın rəngləri” mövzusunda rəsm sərgisi və müsabiqəsi layihəsi elan edilmişdir
Bakı, 30 oktyabr (AZƏRTAC). Azərbaycan Texniki Universitetinin (AzTU) tələbə gənclər təşkilatı Azərbaycan Respublikasının Prezidenti yanında Gənclər Fondunun maliyyə dəstəyi ilə “Fantaziyamın rəngləri” mövzusunda rəsm sərgisi və müsabiqəsi layihəsinin icrasına başlamışdır.
AzTU-nun tələbə gənclər təşkilatından AZƏRTAC-a bildirmişlər ki, layihənin məqsədi rəssamlıq bacarığına malik tələbələrin istedadlarının üzə çıxarılması, bu sahəyə marağın artırılması və davamlı inkişafa nail olunmasıdır.
Layihə iki hissədən - rəsm sərgisi və rəsm müsabiqəsindən ibarətdir. Layihə çərçivəsində rəsm sərgisi təşkil olunacaq və sərgidə nümayiş etdirilən əl işlərinin qiymətləndirilməsi üçün müsabiqə keçiriləcəkdir.
Rəsm sərgisi və müsabiqəsinə işlər “Vətənpərvərlik”, “Fərqli gənclik”, “İdeal düşüncə”, “Sərbəst” nominasiyaları üzrə qəbul olunacaqdır. Tələbə gənclər ilk üç nominasiyanın hər birinə bir, digər nominasiyalara isə maksimum iki rəsm əsəri təqdim edə bilərlər.
Layihəyə təqdim olunan əl işləri noyabrın 15-dək Bakıdakı ali və orta ixtisas təhsili müəssisələrinin tələbə gənclər təşkilatları tərəfindən qəbul ediləcəkdir. Daha sonra isə bütün əl işləri toplanacaq və sərgi-müsabiqə təşkil olunacaqdır.
Qaliblərə diplom və hədiyyələr təqdim ediləcəkdir.
Layihədə iştirak edən tələbələrə sərgi-müsabiqənin keçirilmə yeri və vaxtı barədə əvvəlcədən məlumat veriləcəkdir.