FİTOSANİTAR XİDMƏTİN MÜVAFİQ XARİCİ QURUMLARLA ƏMƏKDAŞLIĞI YÜKSƏK SƏVİYYƏDƏDİR
Kənd Təsərrüfatı Nazirliyi yanında Dövlət Fitosanitar Nəzarət Xidmətinin rəisi Məmmədəli Dünyamalıyev AZƏRTAC-a bildirmişdir ki, müstəqillik qazandıqdan sonra Azərbaycan bir sıra nüfuzlu beynəlxalq təşkilatlara, o cümlədən BMT-nin Ərzaq və Kənd Təsərrüfatı Təşkilatına (FAO), Avropa və Aralıq dənizi hövzəsi regional Bitki Mühafizəsi Təşkilatının Konvensiyasına (EPPO) və s. üzv olmuşdur.
M.Dünyamalıyev vurğulamışdır ki, Dünya Ticarət Təşkilatına üzvlük prosesi çərçivəsində Azərbaycanın üzərinə götürdüyü öhdəliklərdən biri də bitki mühafizəsi və sağlamlığının qorunması ilə bağlıdır. Respublikada bitki mühafizəsi və karantini sahəsində bir sıra işlər görülmüş, fitosanitar vəziyyətin yaxşılaşdırılması istiqamətində məqsədyönlü tədbirlər həyata keçirilmiş, yeni qanunların icra mexanizmləri xeyli təkmilləşdirilmişdir.
Xidmətin rəisi diqqətə çatdırmışdır ki, dünya bazarına bitki, bitki mənşəli məhsulları çıxarmaq üçün ölkədə fitosanitar sabitliyin qorunması vacibdir. Bu baxımdan ölkəmizə xaricdən gələn hər hansı zərərvericinin qarşısını almaq üçün xidmət öz işini daha da gücləndirəcəkdir.
Bölmənin digər xəbərləri
