Formula 1 çempionatının Emiliya-Romanya mərhələsinin mükafatları hərraca çıxarılacaq
Bakı, 31 may, AZƏRTAC
Mayın 19-21-də İtaliyada Emiliya-Romanya Qran-Prisinin keçirilməsi nəzərdə tutulmuşdu. Formula 1 çempionatının təşkilatçıları regionu cənginə alan fəlakətli daşqınlar ucbatından İtaliya mərhələsini ləğv ediblər.
AZƏRTAC xəbər verir ki, yürüş üçün hazırlanan mükafatlar - təsnifatın qalibi üçün miniatür “Pirelli” şini və Qran-Pri qalibləri üçün “Ferrari Trento” şampan şərabı xeyriyyə hərracında satışa çıxarılacaq.
Mərhələnin təşkilatçıları Formula 1 çempionatının suvenirlərinin satışı ilə məşğul olan “F1 Authentics” şirkəti ilə birgə dünya çempionatının təşkilatçıları, “Pirelli” şirkəti, “Ferrari Trento” şampan şərabı tədarükçüləri və İtaliyanın Avtomobil Klubunun tərəfdaşlığı ilə regionda daşqınlardan əziyyət çəkən insanlara yardım toplamaq üçün satışın keçirilməsi barədə qərar qəbul ediblər.
Hərracda Formula 1-in bütün pilotları tərəfindən imzalanan mükafatlar satışa çıxarılacaq. Xatirə hədiyyələri - ikinci və üçüncü yerlər üçün nəzərdə tutulan mükafatlar, eləcə də qalib komandanın mükafatının satışından əldə olunacaq vəsait daşqınlardan əziyyət çəkən Emiliya-Romanya sakinlərinə göndəriləcək. Hərraclar 27 may-6 iyun tarixlərində keçiriləcək.
Bölmənin digər xəbərləri
