FÖVQƏLADƏ HALLAR NAZİRLİYİNİN YARADILMASININ BİR İLLİYİ QEYD OLUNMUŞDUR
Mərasimdə iştirak edən fövqəladə hallar naziri, general-polkovnik Kəmaləddin Heydərov və nazirliyin yüksək rütbəli zabitləri neft yanğınlarının söndürülməsi zamanı istifadə olunan ləvazimata, Rusiyanın Fövqəladə Hallar Nazirliyi ilə bağlanmış sazişə əsasən alınmış 3 ədəd “KamAZ” markalı yanğınsöndürən avtomobilə baxmış, inzibati binadakı iş şəraiti ilə, avadanlıqla tanış olmuşlar.
Həmin gün Nizami və Xətai rayonları yanğınsöndürmə idarələrinin, nazirliyin strukturuna daxil olan Sənayedə İşlərin Təhlükəsiz Görülməsi və Dağ–Mədən Nəzarəti Dövlət Agentliyinin və Dövlət Material Ehtiyatları Agentliyinin inzibati binalarının da təmirdən sonra açılış mərasimləri olmuşdur.
Fövqəladə Hallar Nazirliyinin yaradılmasının bir illiyi münasibətilə Binəqədi rayonu Yanğınsöndürmə İdarəsinin binasında təntənəli iclas keçirilmişdir. Nazir Kəmaləddin Heydərov məruzə ilə çıxış edərək demişdir ki, dekabrın 8–də Prezident İlham Əliyevin hər il dekabrın 16-nın Fövqəladə Hallar Nazirliyi işçilərinin peşə bayramı günü kimi qeyd edilməsi ilə bağlı imzaladığı Sərəncam dövlət başçısının bu sahəyə göstərdiyi diqqət və qayğının, əməyimizə verdiyi yüksək qiymətin təzahürüdür.
Kəmaləddin Heydərov bildirmişdir ki, elm və texnologiyalar inkişaf etdikcə təbii fəlakətlərlə yanaşı, texnogen mənşəli qəzaların başvermə ehtimalı da artır. Fövqəladə hallar nəticəsində insanlar rahatlığını itirir, ölkə iqtisadiyyatına külli miqdarda ziyan dəyir. Belə olan halda, ölkə əhalisinin təhlükəsizliyinin təmin edilməsi məsələsi dövlətin prioritet vəzifələrindən birinə çevrilir.
Məhz buna görə də Prezidentin Sərəncamı ilə Azərbaycanda Fövqəladə Hallar Nazirliyi yaradılmışdır.
Nazir demişdir ki, ötən bir il ərzində əməkdaşların təcrübəsini və ixtisasını artırmaq məqsədi ilə onlar Avropa və MDB ölkələrində təşkil olunmuş treninqlərə, təlimlərə, kurslara göndərilmiş, Rusiyanın Fövqəladə Hallar Nazirliyi ilə əməkdaşlığa dair imzalanan kompleks plan, Türkiyə və Azərbaycan hökumətləri arasında fövqəladə hallarda qarşılıqlı əməkdaşlığa əsaslanan dövlətlərarası, Belarusla nazirliklərarası sazişlər, Koreya Respublikası ilə əməkdaşlığa dair anlaşma memorandumu, Ukraynanın Dövlət Nüvə Tənzimlənməsi Komitəsi ilə radiasiya təhlükəsizliyi sahəsində saziş imzalanmışdır.
Nazirliyin maddi-texniki bazasını möhkəmləndirmək üçün Rusiyadan 16 ədəd yükünü özüboşaldan, 20 ədəd bortlu avtomobil, bir ədəd vertolyot alınmışdır. İlin axırına kimi 50 ədəd yanğınsöndürən avtomobilin alınması nəzərdə tutulur. Gələn il daha 3 ədəd vertolyotun alınması barədə müqavilə hazırlanmışdır. Amfibiya tipli BE-200 təyyarəsinin alınması barədə danışıqlar aparılır. Bundan əlavə, Fransadan 90, Almaniyadan 86, Finlandiyadan 2 xüsusi yanğınsöndürmə texnikası, Türkiyədən 12 ədəd iritutumlu avtobus alınmış, Belarusdan 40-dan çox xüsusi texnika vasitələrinin alınması barədə müqavilə imzalanmaq üzrədir. Nazirliyin fəaliyyəti ilə bağlı xüsusi geyimlər, texniki vasitələr, cihazlar və avadanlıq alınmış və alınmaqdadır.
K.Heydərov bildirmişdir ki, təbii və texnogen mənşəli fövqəladə hallar üzrə etibarlı şəbəkənin, müşahidə və nəzarət sisteminin təşkili, onun proqnozlaşdırılması idarəetmənin təşkilində mühüm amillərdən biridir. Bu baxımdan nazirliyin strukturuna daxil olan regional mərkəzlərin yaradılması, ölkə ərazisini əhatə edəcək coğrafi-informasiya sisteminin tətbiqi ilə bağlı görülən işlər, informasiyanın toplanması fövqəladə hal baş verdiyi təqdirdə qurumların çevik reaksiyasına, vahid mərkəzdən idarəetməyə müsbət təsirini göstərəcəkdir.
Şəxsi heyətə hərbi rütbələr və qiymətli hədiyyələr təqdim edilmişdir.
Mərasimdə Prezident İlham Əliyevə müraciət qəbul olunmuşdur.
Tədbirlərdə Azərbaycan Prezidentinin müdafiə məsələləri üzrə köməkçisi general-leytenant Vahid Əliyev iştirak etmişdir.
